Посетата на Зеленски на Варшава е негова прва средба со новиот полски претседател Карол Навроцки, кој е поддржан првенствено од националистичката полска десница, која традиционално ја користи антиукраинската карта за освојување политички поени
Полскиот претседател Карол Навроцки денеска по разговорите со украинскиот претседател Володимир Зеленски во Варшава изјави дека има лоши вести за Москва.
„Полска и Европа се обединети во стратегиските безбедносни прашања и помошта за Украина, и за тоа нема спор. Посетата е доказ дека Полска, Украина и земјите од регионот, кои ги делат демократските вредности, се обединети во стратегиските безбедносни прашања. Тоа никогаш не било спорно“,
рече Навроцки.
Полскиот претседател нагласи дека Русија е земја која го уништува меѓународниот поредок, ги крши принципите на меѓународното право и со години го дестабилизира политичкиот систем во Европа, не само воено, туку и со секојдневни хибридни напади, и дека само американскиот претседател Доналд Трамп може да го принуди рускиот претседател Владимир Путин да потпише мир, иако, рече тој, Путин нема навика да ги почитува договорите.
„Мирот треба да биде долг и обврзувачки, а не да купува време за Русија да се прегрупира“,
рече Навроцки.
Претседателот Зеленски денеска во Варшава им се заблагодари на Европската Унија и Полска за нивната одлука да ѝ помогнат на Украина во следните две години со 90 милијарди евра.
„Средствата на ЕУ ни даваат финансиска сигурност ако Русија продолжи со војната, а ние имаме такви сигнали. Ќе ги инвестираме овие средства во одбраната. Ако светот ја принуди Русија да склучи мир, ние ќе ги инвестираме во реконструкција. Важно е руските средства да останат замрзнати и Русија да ја плати штетата што ја предизвика“,
рече Зеленски.
Претседателите едногласно оценија дека Русија е закана не само за Украина, туку и за цела Европа.
Во врска со изјавата на белорускиот претседател Александар Лукашенко дека најновиот руски ракетен систем „орешник“ во белоруската армија стапил во борбена должност, полскиот претседател рече дека тоа не е изненадување и потсети дека Полска со години е изложена на хибридни напади и од Русија и од Белорусија.
„Знаеме каде ќе биде ‘орешник’, им даваме информации на нашите партнери. Сметаме на нашите партнери дека ќе можат да ја проценат оваа закана и како да реагираат на неа. Ги предупредивме, го знаеме овој систем, тој беше употребен против Украина“,
рече Зеленски.
Украинскиот претседател потсети дека Киев побарал од своите сојузници да воведат санкции против компании во трети земји кои произведуваат компоненти за овој современ руски ракетен систем, но дека нема такви санкции.
„Зошто нашите партнери не ја гледаат заканата од Белорусија?“,
праша Зеленски.
Навроцки и Зеленски денеска разговараа и за билатерални прашања, првенствено за помирувањето околу ужасните настани од минатото и ексхумацијата на жртвите од масакрот во Волинија од Втората светска војна, кога вооружено крило на украински националисти изврши етничко чистење не само во полските, туку и во чешките и еврејските села во таа област на западот од денешна Украина, во кое беа убиени десетици илјади луѓе.
Навроцки рече дека и Полска и Украина се свесни дека Русија го користи своето разјаснување на минатото за да ги подели и да шири дезинформации меѓу Полјаците и Украинците.
„Со решавање на ова прашање, ја исклучуваме Руската Федерација од расправијата во нејзиниот обид да нè подели“,
рече Навроцки.
Посетата на Зеленски на Варшава е негова прва средба со новиот полски претседател Карол Навроцки, кој е поддржан првенствено од националистичката полска десница, која традиционално ја користи антиукраинската карта за освојување политички поени.
Навроцки денеска рече дека Полјаците, како што се гледа во анкетите и, неодамна, во атмосферата во општеството, имаат впечаток дека Украина не е доволно благодарна и не ја цени доволно помошта од Полска, која, според него, обезбедила 4,9 проценти од БДП на Полска од почетокот на војната во 2022 година.