Според партијата, и покрај констатираните пропусти од повеќе инспекции, Градот Скопје и јавните предупредувања, досега нема ниту една конкретна мерка за затворање или отстранување на опасните реквизити
Дали градоначалникот на Општина Аеродром, Дејан Митески, чека да се случи трагедија, па тогаш да го затвори забавниот парк „Зимзоленд“, лоциран во Ново Лисиче, прашуваат денеска од партијата Левица. Оттаму велат дека и покрај утврдените неправилности и отворениот предмет во Јавното обвинителство за општа опасност, „Зимзоленд“ во Општина Аеродром и понатаму работи.
„Наместо итна реакција, градоначалникот се крие зад процедури и рокови, и ја префрла одговорноста. Во меѓувреме, безбедноста на граѓаните, а пред сè на децата, е занемарена“,
рече на денешната прес-конференција Горан Костовски, советник од Левица во Општина Аеродром.
Според него, законот е јасен дека кога постои опасност, објектот мора веднаш да се затвори.
„Очигледно ова за градоначалникот Митески не важи. И покрај констатираните пропусти од повеќе инспекции, Градот Скопје и јавните предупредувања, досега нема ниту една конкретна мерка за затворање или отстранување на опасните реквизити“,
кажа тој.
Советниците на Левица јавно побараа општината да дејствува, но, како што додаде, добиле само празни уверувања дека процедурата е во тек.
„Прашањето е дали институциите ќе реагираат навреме или повторно ќе чекаат трагедија за да преземат одговорност“,
вели Костовски.
Основното јавно обвинителство (ОЈО) Скопје оформи предмет за функционирањето на лунапаркот „Зимзоленд“ во општина Аеродром, за да испита дали евентуално постојат елементи на кривичното дело предизвикување општа опасност.
Предметот е отворен по допрен глас, а доаѓа по јавно објавените информации во јавноста дека надлежните инспекторати не постапуваат согласно своите надлежности за отстранување на реквизитите.
Од Градот Скопје велат дека иако неговите инспекциски служби утврдиле оти „Зимзоленд“ нема дозвола, за отстранување на лунапаркот е надлежна Општината Аеродром.
Од Општина Аеродром, пак, велат го следат законот според кој треба да поминат осум дена, откако фирмата го примила записникот од инспекцискиот совет. Инспекторите, како што се наведува, на терен биле на 10 декември, па најран датум на кој Општината би можела да постапува е 18 декември.
Од „Зимзоленд“ минатата недела потврдија дека во забавниот парк се вршат инспекциски надзори, но ги демантираа наводите во дел од медиумите дека паркот ќе биде затворен.