Носителот на правото на брендот „Ариел“ потврдил дека предметниот прашок е фалсификат и со тоа ги повредува правата од интелектуална сопственост, заради што се согласиле запленетата стока да биде уништена
Царинските службеници од Царинската испостава Тетово спречиле обид за криумчарење на голема количина прашок за перење алишта, натоварен во Турција и наменет за увозник од Скопје.
Според информациите од Царинската управа, запленети се вкупно 2 000 килограми, односно 200 вреќи од по 10 килограми прашок за перење со трговска марка „Ариел“.
Преку одделението за нетарифни мерки и заштита на правата од интелектуална сопственост, веднаш бил известен правниот застапник на носителот на правото – брендот „Ариел“.
Тој потврдил дека предметниот прашок е фалсификат и со тоа ги повредува правата од интелектуална сопственост, заради што се согласиле запленетата стока да биде уништена.
Од Царинската управа посочуваат дека против сторителот на криумчарењето, по спроведување постапка, ќе биде поднесена соодветна пријава.
„Секојдневните заложби на царинските службеници во сузбивање на нелегалната трговија и шверцот се многу важни со цел заштита на здравјето на граѓаните и спречување криумчарење на производи коишто се штетни за здравјето на граѓаните, како и заштита на животната средина од загадување предизвикано од неконтролиран хемиски состав“,
се наведува во соопштението од Царина.