За денеска закажана средба меѓу украинската и американската делегација, преговарачите ќе информираат за средбата со Путин

Средбата доаѓа откако Виткоф помина речиси пет часа во разговор со рускиот претседател Владимир Путин во Москва, преговори за кои Кремљ рече дека „не доведоа до компромис“ за завршување на војната во Украина

Специјалниот претставник на САД, Стив Виткоф, денеска ќе се сретне со шефот на Советот за национална безбедност на Украина, Рустем Умеров, на разговори во Мајами, потврди Белата куќа.

Како што пишува Би-би-си, средбата доаѓа откако Виткоф помина речиси пет часа во разговор со рускиот претседател Владимир Путин во Москва, преговори за кои Кремљ рече дека „не доведоа до компромис“ за завршување на војната во Украина.

Конструктивен, но без напредок – оценка на советникот на Путин за состанокот со САД за мировниот план за прекин на војната

Американските претставници се очекува да ја брифираат украинската делегација за нивните разговори со рускиот претседател Владимир Путин во Москва.

Американскиот претседател Трамп вели дека разговорите – на кои присуствувал и неговиот зет Џаред Кушнер – биле „разумно добри“, но додаде дека е прерано да се каже што ќе се случи бидејќи, како што рече, „потребни се двајца за танго“.

На новинарско прашање дали Виткоф и Кушнер веруваат дека Путин навистина сака да ја заврши војната, Трамп рече дека нивниот впечаток бил дека сака да ја заврши војната.

Вчера, украинскиот претседател Володимир Зеленски објави планови за нови разговори меѓу украински и американски претставници.

Во објава на Икс, Зеленски напиша оти светот јасно чувствува дека постои реална можност да се стави крај на војната. Но, тој додаде дека преговорите мора да бидат „поткрепени со притисок врз Русија.

Украинската делегација се подготвува за нови разговори во САД, вели Зеленски