Јуриј Ушаков, советникот на рускиот претседател за надворешна политика, додаде дека Москва не гледа шанси за решавање на украинската криза без територијални прашања
Конструктивен, но без напредок – вака советникот за надворешна политика на Владимир Путин, Јуриј Ушаков, го опиша состанокот меѓу рускиот претседател и специјалниот американски претставник Стив Виткоф што се одржа вчера во Москва. По петчасовниот разговор во Кремљ, Ушаков изјави дека мирот е ниту поблиску ниту подалеку.
„Не разговаравме за конкретните формулации што ги подготвија Американците, туку за суштината на пораката. Некои работи ни одговараат. Некои работи наидоа на наша критика“,
изјави советникот на рускиот претседател за надворешна политика.
Тој додаде дека Москва не гледа шанси за решавање на украинската криза без територијални прашања.
„За навистина да постигнеме напредок, време е и Москва и Вашингтон да почнат сериозно да работат“,
рече Ушаков.
Тој додаде дека покрај ревидираниот план од 28 точки за мир, кој Москва не го видела, Русија добила и четири дополнителни документи од американската страна за дискусија. Во изјава за медиумите тој дополнително рече дека САД и Русија се согласиле да не откриваат детали за разговорите.
Специјалниот американски претставник Стив Втикоф засега не даде коментар околу средбата со Путин.
Виткоф и зетот на американскиот претседател Доналд Трамп, Џаред Кушнер, дојдоа во Москва за да се сретнат со Путин откако првичниот предлог на САД од 28 точки за ставање крај на војната во Украина беше преработен на 19 точки по разговорите на американските и украинските делегации минатата недела.