Дополнително, како што информира директорката на ИЈЗ, од донесените материјали за две деца од фецес, кај едно било утврдено дека е позитивно, односно дека има норовирус, кој може да даде идентична клиничка слика како тегобите што ги пријавиле заболените и е вирус кој многу лесно и долго време опстојува на работните површини, масички и столчиња
Бактерии од групата Enterobacteriaceae се пронајдени на чешмите и во храната што ја консумирале децата од кујната во Основното општинско училиште „Димо Хаџи Димов“ во скопската општина Карпош.
Ова го покажале досегашните анализи на примероци земени од чешмите и кујната и другите работни површини, што според Институтот за јавно здравје укажува на нехигиена во училиштето и е најверојатната причина за труењето на поголем број ученици.
За резултатите од анализите денеска на прес-конференција информира в.д. директорката на Институтот за јавно здравје, Марија Андоновска.
Кај едно дете, како што соопшти таа, е констатирано дека има лесно пренослив норовирус, кој може да ги даде истите симптоми и тегоби на кои се пожалија ученици во „Димо Хаџи Димов“.
Дополнително, кај една вработена било утврдено присуство на бактеријата стафилокока (Staphylococcus aureus).
Истовремено бројот на хоспитализирани ученици на Клиниката за детски болести се зголеми од пет на седум деца. Имено, како што информираат оттаму, денеска биле примени две нови деца кои пројавиле симптоми на труење, како и претходните пет што беа примени на Клиниката.
Сите седум деца што се примени на Клиниката за детски болести се во стабилна состојба.
Детектираните бактерии и норовирус предизвикуваат симптоми на дијареја, повраќање и тегоби во стомакот, односно симптоматологија која беше утврдена кај ученици во „Димо Хаџи Димов“.
Од Институтот за јавно здравје соопштија дека денеска добиле нов резултат од примерок од мусака која се служела во прва смена во училиштето и во неа се најдени грам негативни бактерии од групата Enterobacteriaceae, фекални бактерии кои исто така се пронајдени и на 3 чешми во училиштето.
Имено, како што соопшти в.д. директорката на ИЈЗ, Андоновска, од девет чешми од кои биле земени примероци за анализа, кај три било утврдено присуство на бактеријата. Едната чешма била во кујната, додека другите две биле во училници.
„Од брисевите од оние работни површини – од кваките, од чешмите, од садовите од коишто јаделе и од пултот, можам да кажам дека од девет земени површини три се веќе позитивни, т.е. позитивни се рачните чешми од две одделенија и една чешма во кујната. На овие површини се најдени бактерии од групата Enterobacteriaceae, тоа се грам негативни бактерии кои можат да дадат ваква симптоматологија како што покажува клиничката слика кај веќе заболените. Значи, тие можат да дадат ваква клиничка слика, што укажува на нехигиена“,
рече Андоновска.
Дополнително, како што информира таа, донесени се материјали за две деца од фецес, од кои кај едното било утврдено дека е позитивно, односно има норовирус.
„Норовирусот, исто така, може да даде клиничка слика како тегобите што ги пријавиле заболените, а од друга страна информирана сум дека е вирус кој многу лесно и долго време перзистира на работните површини, масички и столчиња“,
рече Андоновска.
Земените брисеви од грло и нос од пет деца во текот на вчерашниот ден, додаде таа, се негативни на ковид-инфлуенца, а дополнително се чекаат резултати за евентуално присуство на други вируси.
Од ИЈЗ велат дека бројот на земени примероци и пристигнати материјали е голем и дека сè уште пристигнуваат материјали за анализа.
Претходно денеска, ЈП „Водовод и канализација“ објави дека направените анализи на земените примероци од водата во училиштето покажале дека таа е исправна за употреба.
Вчера Агенцијата за храна и ветеринарство (АХВ) соопшти дека по случајот во „Димо Хаџи Димов“ нејзини инспекциски тимови спроведуваат вонредни контроли во кујните на девет основни училишта во Општина Карпош.
Контролите се вршат бидејќи со сите овие кујни стопанисува истиот оператор со храна во чија сопственост е и централниот магацин, лоциран во ОУ „Димо Хаџи Димов“ во Скопје, од каде што се набавуваат репроматеријали.