Од ССКМ велат дека ќе ја почитуваат одлуката и изречената финансиска казна, потенцирајќи дека единствено слободниот пазар е основниот параметар според кој се формираат цените
Од Сојузот на стопански комори на Македонија (ССКМ) велат дека изречената парична казна од страна на Комисијата за заштита на конкуренцијата е за дејствија преземени од претходното раководство на Сојузот.
Од ССКМ истакнуваат дека изречената казна се однесува на активности кои се случиле во февруари 2025 година, кога, според нив, претходното раководство „не почитувајќи ги структурите и кршејќи го статутот“ го вовлекло Сојузот во одредени дејствија.
Новиот претседател на ССКМ, Горан Ѓорѓиевски, ја потврдува информацијата велејќи дека ова е една од причините поради кои претходното раководство било разрешено.
„Ова се плодовите на работењето од претходното раководство во Сојузот на стопански комори на Македонија, кои се потврдуваат со паричната казна добиена од Комисијата за заштита на конкуренцијата, како и нарушување на угледот на ССКМ. Ова е и една од големиот број на причини поради кои претходното раководство беше разрешено едногласно на вонредното собрание во јули 2025 година“,
вели Ѓорѓиевски.
Тој нагласи дека ССКМ ќе ја почитува одлуката и изречената финансиска казна, потенцирајќи дека единствено слободниот пазар е основниот параметар според кој се формираат цените.
ССКМ потенцира дека како организација повеќе од две децении работи во интерес на компаниите, почитувајќи ги законските рамки и принципите на професионалност и транспарентност. Тие додаваат дека нивната улога е да обезбедат поддршка и информираност „без какво било влијание врз деловните одлуки на компаниите или нивните пазарни политики“.
Од Комисијата за заштита на конкуренцијата (КЗК) вчера информираа дека биле изрече прекршочни санкции – глоби во вкупен износ од 13 443 000 денари против четири трговски друштва од пазарот на малопродажба на прехранбени производи и Сојузот на стопански комори на Македонија (ССК).
Секое од трговските друштва е казнето со по 3 075 000 денари, додека висината на казната што се однесува за ССК, кои биле координатори, е 1 143 000 денари.
Санкциите се изречени откако Комисијата утврдила дека друштвата и ССК учествувале во забранет договор или усогласено однесување, со што ја нарушиле конкуренцијата.