Минатата недела комесарот на Федералната администрација за воздухопловство Брајан Бедфорд изјави дека 20 до 40 проценти од контролорите на летање не се појавиле на работа на 30-те најголеми аеродроми во САД од блокадата на владата
Американскиот претседател Доналд Трамп денеска ги повика контролорите на летање веднаш да се вратат на работа бидејќи намалувањето на летовите наложено од владата и отсуството на персоналот од работа продолжуваат да го нарушуваат воздушниот сообраќај во САД, јавуваат светските медиуми.
Трамп додаде дека ќе ги награди оние што не зедоа одмор за време на 41-дневното затворање на федералната влада, како и дека би ги поздравил отказите на оние контролори на летање што се решиле на ваков потег.
„Сите контролори на летање мора да се вратат на работа, СЕГА!!! Секој што нема да го стори тоа ќе биде ‘отпуштен’. ВЕДНАШ ДА СЕ ЈАВИТЕ НА РАБОТА“,
напиша Трамп на социјалните мрежи.
Блокадата на федералната влада резултира со недостиг на контролори на летање кои, како и другите федерални вработени, кои поради ситуацијата не добиваа плати со недели, поради што некои од нив решија да бараат друга работа.
Минатата недела комесарот на Федералната администрација за воздухопловство Брајан Бедфорд изјави дека од 20 до 40 проценти од контролорите на летање не се појавиле на работа на 30-те најголеми аеродроми во САД од блокадата на владата.
„Проблемите со персоналот се влошија во текот на викендот, а саботата беше најлошиот ден во годината“,
изјави вчера министерот за транспорт на САД, Шон Дафи.
Авиокомпаниите денеска откажаа повеќе од 1 500 лета во Соединетите Американски Држави, на четвртиот последователен ден по откажувањето на повеќе од 1 000 лета бидејќи недостигот на контролори на летање и ограничувањата на летовите продолжија да го нарушуваат воздушниот сообраќај земјата.
Веб-страницата за следење на летови „Флајтавер“ (FlightAware) објави дека до денеска во14:30 часот повеќе од 1 550 лета биле откажани, а 1 400 биле одложени откако еден ден претходно беа откажани 2 950 лета, а 10 800 беа одложени, што беше оценето како најлошиот ден за воздушниот сообраќај во САД по блокадата на федералната влада што почна на 1 октомври.
Инаку, на прекините во воздушниот сообраќај влијае и снежната бура што го зафати градот Чикаго во сојузната држава Илиноис.
Федералната администрација за воздухопловство (ФАА) вчера доцна вечерта објави дека го суспендира општиот воздушен сообраќај на 12 аеродроми кои се соочуваат со недостиг на работници, вклучувајќи го аеродромот „О’Хара“ во Чикаго и „Роналд Реган“ во Вашингтон.
Американскиот Сенат се приближи до донесување закон за прекин на блокадата на владата доцна вчера.
За потсетување, ФАА им нареди на авиокомпаниите да ги намалат своите дневни летови за четири проценти на 40 главни аеродроми почнувајќи од петок поради загриженост за безбедноста на воздушниот сообраќај.
Она што останува под знак прашалник за авиокомпаниите е кога ФАА ќе ги укине ограничувањата во воздушниот сообраќај.
Министерот за транспорт Шон Дафи изјави дека дека првин сака да види подобрувања во бројот на контролори на летање, како и тоа што ќе кажат податоците за безбедноста.