Министерот за внатрешни работи на Индија, Амит Шах, изјавил дека истрагата ги разгледува сите можности во врска со причините и околностите поврзани со експлозијата
Најмалку осум лица се обиени, а повеќе од 20 се повредени во експлозија на автомобил пред историската знаменитост Црвена тврдина во индиската престолнина Њу Делхи, јавуваат светските медиуми.
Околностите за експлозијата на автомобилот, која се случила денеска непосредно пред 19 часот според локално време, засега се непознати, пишува „Гардијан“.
Според полицијата во Њу Делхи, возилото што се движело бавно застанало на црвено светло веднаш пред метро-страницата кај Црвената тврдина, по што се случила детонацијата, која предизвикала пожар, а од експлозијата се оштетени уште неколку возила што се наоѓале во близина.
„Експлозијата се случила во едно возило, а поради неа оштетени се и други возила во близина“,
изјавил комесарот на полицијата во Њу Делхи, Сатиш Голча.
Полицискиот комесар потврдил дека во експлозијата загинале најмалку осум лица, а повеќе од 20 се повредени.
„Ситуацијата се следи. Го истражуваме инцидентот и наскоро ќе излеземе со повеќе информации“,
додал тој.
Министерот за внатрешни работи на Индија, Амит Шах, изјавил дека истрагата ги разгледува сите можности во врска со причините и околностите поврзани со експлозијата.
Инаку, Црвената тврдина е голема палата од 17 век изградена од Могулите и е еден од најзначајните историски споменици во Индија. Тоа е местото од кое премиерот на Индија го одржува своето годишно обраќање на Денот на независноста на земјата.
Лоцирано е во густо населената област Стар Делхи, во главниот град на Индија, каде што вообичаено има многу луѓе, тезги со храна и возила, и претставува популарна туристичка дестинација.
Според извештаите на светските медиуми, по експлозијата на местото на настанот се упатиле повеќе противпожарни и амбулантни возила.
По експлозијата кај Црвената тврдина во Њу Делхи, според „Гардијан“, била издадена тревога за претпазливост и во градот Мумбаи.
Во соседната индиска држава Утар Прадеш, исто така, била издадена наредба за зголемување на безбедносните мерки околу верските објекти и чувствителните гранични области.