Во тој контекст, оттаму додаваат дека полека но сигурно правдата и одговорноста доаѓаат и дека никој нема да биде заштитен, без разлика на неговата партиска, политичка, верска или етничка припадност
Во врска со случајот, денеска со соопштение се огласија и од АД „Електрани на Северна Македонија“, од каде што велат дека приведените лица се дел од поранешното раководство на РЕК „Битола“, а постапката што ја водат надлежните органи се однесува на дејствија и одлуки донесени во претходниот период, пред сегашното раководство да ја преземе функцијата
Она што како партија изминативе години го говоревме дека СДСМ местел тендери со омилената „Марковски компани“ излезе на површина, велат од владејачката ВМРО-ДПМНЕ откако Основното јавно обвинителство Битола отвори нова истрага за злоупотреби во РЕК „Битола“, а во која првоосомничен е бизнисменот Борче Марковски, прв човек на компанијата која во минатото имаше повеќе тендерски зделки со Комбинатот.
„Финансиската полиција по сомнение за местење тендер, соодветно постапила и уапсен е Борче Марковски, човекот што ја води компанијата ‘Марковски’, кој е осомничен за испумпување на околу 100 милиони денари од Буџетот на државата. Инаку, за тоа колку компанијата ‘Марковски’ им била омилена на СДС и ДУИ, говори фактот што за две години добиле 200 милиони евра од државата. ВМРО-ДПМНЕ многупати говореше за сомнежи во работата на Владата на СДС и ДУИ, во однос на компанијата ‘Марковски’, но надлежните институции спиеја на тоа уво“,
се вели во соопштението од ВМРО-ДПМНЕ.
Во тој контекст, оттаму додаваат дека полека но сигурно правдата и одговорноста доаѓаат и дека никој нема да биде заштитен, без разлика на неговата партиска, политичка, верска или етничка припадност.
Бизнисменот Борче Марковски и уште седум други лица денеска беа уапсени под основани сомненија дека како група сториле кривични дела поврзани со јавна набавка за дислокација на погонски станици од ТЕЦ „Осломеј“ во РЕК „Битола“.
Меѓу другите осомничени, еден е вработен во „Марковски компани“, која исто така е опфатена во истрагата како правно лице, додека другите се поранешни раководители во Комбинатот. Меѓу нив е поранешниот директор во РЕК „Битола“, Пеце Матевски, кој веќе е обвинет во предметот „Адитив“, исто така за злоупотреби за кои веќе се води судска процес.
Дека е отворена нова истрага за злоупотреби во РЕК „Битола“ попладнево официјално соопштија од Јавното обвинителство на Република Северна Македонија. Како што информираа оттаму истрагата ја води битолското основно јавно обвинителство, а по поднесена кривична пријава од Управата за финансиска полиција.
Сумирано, опремата што „Марковски компани“ требало да ја дислоцира, според рударскиот проект за експлоатација на рудникот за кој била наменета, воопшто не била предвидена.
Независно од тоа, тендерот се спровел и го добил „Марковски компани“ ДООЕЛ за сума од околу 1,7 милиони евра, а целата постапка се одвивала кон крајот на 2023 и почетокот на 2024 г. За тие пари, фирмата требало да ја демонтира опремата во ТЕЦ „Осломеј“, да ја транспортира до новата локација близу РЕК „Битола“ и потоа да ја монтира за да се употребува за транспорт на рудата која се ископувала на локацијата. „Марковски компани“ ги направиле првите два чекора, демонтажата и транспортот, но наместо да се монтира, опремата била само оставена во кругот на РЕК „Битола“ без да се монтира и употребува.
Од Обвинителството рекоа дека јавниот обвинител до Основниот суд Битола денеска ќе достави предлог за одредување мерка притвор за две лица – сопственикот на фирмата и за еден раководител од ПЕ „Рудници“, додека за две други раководни лица од РЕК „Битола“ и за вработениот во компанијата ќе бидат предложени мерки на претпазливост – одземање патна исправа и повремено јавување во Судот.
Оттаму додаваат дека поранешниот директор на РЕК „Битола“ веќе се наоѓа во притвор по друга постапка и оти уште едно службено лице од Комбинатот во друга постапка е веќе обезбедено со мерки на претпазливост кои ги почитува до овој момент.
Во врска со случајот денеска со соопштение се огласија и од АД „Електрани на Северна Македонија“, од каде што велат дека приведените лица се дел од поранешното раководство на РЕК „Битола“, а постапката што ја водат надлежните органи се однесува на дејствија и одлуки донесени во претходниот период, пред сегашното раководство да ја преземе функцијата.
„Го охрабруваме целосното расветлување на случајот и изразуваме поддршка за институциите во спроведување на законските процедури, со цел утврдување на фактичката состојба. Во интерес на точно информирање, апелираме до медиумите и јавноста да се прави јасна разлика помеѓу поранешното и сегашното раководство, и да не се изнесуваат дезинформации кои можат да ја нарушат довербата во работата на АД ЕСМ“,
се наведува во соопштението од АД ЕСМ.
Како опозиција, ВМРО-ДПМНЕ често ја критикуваше „Марковски компани“ како фирма блиска на СДСМ, особено откако беше потпишан договорот од 46 милиони евра на почетокот на 2024 година за ископ на јаглен во РЕК „Битола“. По промената на власта на ланските парламентарни избори, овој договор со „Марковиски компани“ беше раскинат.