Од „Стоп за Вардариште“ велат дека барањата биле доставени до највисоките државни институции, вклучувајќи ги претседателката, Владата и ресорните министерства, како и до општинските власти. Досега, како што велат оттаму, не е добиен никаков одговор
Иницијативата „Стоп за Вардариште“ најави блокада на мостот „Близнаци“ во Скопје, кој ги поврзува општините Аеродром и Гази Баба. Протестот е закажан за утре, петок, 26 септември 2025 година, и ќе започне во 07:30 часот.
Покрај утринската блокада, иницијативата потврди дека ќе има и протест со почеток во 18 часот, кој повеќе од две недели се одржува на истата локација. Овие чекори се преземаат по истекот на петдневниот рок кој беше даден на институциите за започнување на исполнувањето на итните барања.
Иницијативата бара 24-часовен видео- и физички надзор на депонијата Вардариште, итно иселување и соодветно згрижување на лицата кои живеат на територијата на депонијата, поставување ограда околу Вардариште и започнување на процес за нејзино конечно затворање, откривање и казнување на потпалувачите и организаторите на пожарите.
Од Иницијативата бараат и ригорозни мерки против сите што фрлаат отпад.
Од „Стоп за Вардариште“ велат дека барањата биле доставени до највисоките државни институции, вклучувајќи ги претседателката, Владата и ресорните министерства, како и до општинските власти. Досега, како што велат оттаму, не е добиен никаков одговор.
Иницијативата „Стоп за Вардариште“ ги повикува граѓаните да се приклучат на протестите, а работодавците и возачите ги молат за разбирање поради можниот застој во сообраќајот.
Изминатите дваесетина дена жителите на Аеродром и Ново Лисиче во организација на граѓанската иницијатива „Стоп за Вардариште“ бараат надлежните да го слушнат нивниот глас и да најдат трајно решение за дивата депонија во Вардариште.
Протестите дојдоа откако на крајот на август избувна голем пожар на дивата депонија во Вардариште, по кој воздухот со денови мирисаше на ѓубре и на изгорено.