Американскиот претседател, Доналд Трамп, на Твитер соопшти дека дал наредба за повлекување на Националната гарда од главниот град Вашингтон, бидејќи како што пишува сега ситуацијата била совршено под контрола. Но, тој вели дека доколку е потребно тие повторно ќе се вратат.
Владата на дистриктот Колумбија минатата недела побара од гардата да ѝ помогне на полицијата да ги смири протестите по смртта на Џорџ Флојд. Тогаш Трамп нареди илјадници припадници на гардата и федералните безбедносни сили да бидат на улиците на Вашингтон, по одделните случаи на грабеж и насилство. Градоначалничката на Вашингтон, Мјуриел Баузер минатата недела го повика Трамп да ги повлече припадниците на Националната гарда кои некои држави ги испратија во главниот град.
Вчерашниот протест во Вашингтон се најавуваше како најмасовниот во последниве неколку дена откако почнаа протестите против полициската бруталност и расизмот. По улиците низ градот имаше илјадници граѓани, но Трамп рече дека „очекувал многу повеќе“.
„Многу помала турканица во Вашингтон отколку што се очекуваше. Националната гарда, тајната служба и полицијата во Вашингтон прават фантастична работа. Им благодарам“,
напиша Трамп на Твитер.
Граѓаните, револтирани од неговите твитови, одговорија со објавување на снимки и фотографии од улиците на САД преплавени со демонстрантите.
„Има повеќе луѓе отколку на неговата инаугурација“,
коментираше еден од твитерџиите.
Протестите вчера главно минаа без инциденти, освен во Сиетл каде полицијата се судри со демонстрантите.