Министерот за надворешни работи и надворешна трговија Тимчо Муцунски, пак, во интервју за „Политико“ рече оти Македонија не е подготвена да направи уставни измени без гаранција од ЕУ дека тоа е последното барање од Софија
Важно е да се испорачаат преостанатите обврски и земјата да продолжи напред во процесот на пристапување во Европската Унија – порача еврокомесарката за проширување Марта Кос по средбата со македонскиот министер за надворешни работи и надворешна трговија Тимчо Муцунски. Во објава на социјалните мрежи, меѓу другото, Кос вели дека заедно со Муцунски имала отворен разговор во однос на следните чекори кон европскиот пат на земјата кој, како што кажа, таа силно го поддржува, како и за Планот за раст. Дополнително, ја поздрави целосната усогласеност на Македонија со Заедничката надворешна и безбедносна политика (ЗНБП) на Европската Унија, како и помошта што земјава ѝ ја дава на Украина.
Open discussion with @TimcoMucunski today on the next steps on 🇲🇰's EU accession path which I strongly support, and Growth Plan reforms.
— Marta Kos (@MartaKosEU) August 26, 2025
Important to deliver on remaining requirements, and move forward with EU accession.
I welcomed 🇲🇰's full CSFP alignment & contribution to 🇺🇦! pic.twitter.com/aV92xyh4re
Министерот Муцунски, пак, во интервју за „Политико“ рече оти во моментот Македонија не е подготвена да ги направи уставните измени што ги бара Бугарија, освен ако не добие цврсти гаранции од Европската Унија, дека тоа ќе биде последно барање на Софија.
„Нашиот став е: Ако ги направиме уставните измени, што ќе се случи ако Бугарија за шест месеци повторно дојде со барања поврзани со историјата, идентитетот или јазикот“,
рече Муцунски.
Вчера, по средбата на Кос и Муцунски во Брисел, во соопштението објавено на веб-страницата на Министерството за надворешни работи и надворешна трговија се наведува дека на состанокот се разговарало за повеќе теми, но не се спомнува дека се разговарало и за обврските што земјава ги има за продолжување на преговорите со Европската Унија.