(ФОТО) Министерот Алиу се сретна со д-р Кедев: Приватните болници од септември ќе треба да го информираат Здравство за извршените прегледи и интервенции

Минатата недела Алиу најави оти веќе е комплетиран експертскиот тим од тројца странски лекари што ќе треба да ги „чешлаат“ документациите на приватните клиники за да проверат дали се вистинити наводите оти таму се вршеле кардиолошки интервенции само за да се извлечат пари од граѓаните

Министерот за здравство Азир Алиу денеска оствари средба со кардиохирургот д-р Сашко Кедев на која тие разменија информации во врска со наводите дека се вршеле непотребни кардиолошки интервенции кај пациенти во приватните болници, информираат денеска од Министерството за здравство (МЗ).

Оваа средба следува откако минатата недела д-р Кедев на јавен настап рече дека во приватните клиники во земјава се прават непотребни кардиолошки интервенции со цел да се извлечат пари од граѓаните.

Во таа насока, Алиу посочи дека ќе биде испратен допис со кој сите приватни здравствени установи се задолжени од 15 септември да го информираат ресорното министерство, односно Управата за електронско здравство за сите извршени прегледи и интервенции.

Министерот Алиу во понеделник ќе оствари средба со д-р Кедев

Од Здравство ги повикуваат сите засегнати страни што имаат каква било информација за неправилности во системот веднаш се обратат до нив.

Минатата недела Алиу најави оти веќе е комплетиран експертскиот тим од тројца странски лекари што ќе треба да ги „чешлаат“ документациите на приватните клиники за да проверат дали се вистинити наводите оти таму се вршеле кардиолошки интервенции само за да се извлечат пари од граѓаните.

По укажувањата на д-р Кедев, ќе се формира комисија за стручен надзор од тројца експерти од странство

Директорот на Фондот за здравствено осигурување Сашо Клековски, пак, рече дека граѓаните што сметаат дека биле оштетени во кардиохирургија или при други медицински интервенции треба да поднесат службени жалби.

Тој нагласи дека ФЗОМ нема договори за стентирање со приватните клиники „Жан Митрев“ и „Систина“ и оти капацитетите за интервентна кардиологија во јавните установи се доволни – во Скопје, Тетово, Битола, Штип и Охрид.

Клековски појасни дека Фондот склучува договори со приватните здравствени установи само во области каде што нема јавен капацитет.

Клековски апелира пациентите да поднесат жалби ако мислат дека се оштетени од направени интервенции

Од Фондот за здравствено осигурување (ФЗО) излегоа и со официјално соопштение по наводите на д-р Кедев, во кое велат дека се вршат редовни контроли на спроведувањето на договорните обврски со јавните и со приватните здравствени установи, со цел да обезбеди здравствените услуги да се изведуваат во согласност со законските прописи и склучените договори и оти во сите установи, како што посочуваат, се вршат редовни годишни контроли, а Фондот постапува и по поднесени претставки на пациенти или по сопствен наод.

Во изминатите четири години, според ФЗО, не се евидентирани претставки за непотребни медицински интервенции.