Почнавме со прелиминарни операции и првите фази од нападот врз Газа, а израелските вооружени сили веќе ги држат перифериите, соопшти израелската армија
Израелската армија ги презеде првите чекори во својата операција за воспоставување контрола врз градот Газа, пренесува Ројтерс, повикувајќи се на изјава на портпаролот на воените сили на Израел, Ефи Дефрин.
Претходно, израелската армија соопшти дека испратени се околу 50 000 нови покани за резервисти со што започнале подготовките за операцијата која израелската влада претходно ја одобри за преземање на градот Газа.
„Почнавме со прелиминарни операции и првите фази од нападот врз Газа, а израелските вооружени сили веќе ги држат перифериите“,
изјави Дефрин.
Израелскиот министер за одбрана, Израел Кац денеска даде зелено светло на планот наречен „Кочиите на Гидеон II“ што се смета за продолжение на планот одобрен во мај годинава со кој се предвидува Палестинците да бидам преместени во јужната зона на Појасот Газа.
Планот му беше презентиран од началникот на Генералштабот Ејал Замир и високото воено раководство, а на состанокот присуство земале и заменик-началникот на Генералштабот Тамир Јадај, раководителите на военото разузнавање, воените операции, координацијата на владини активности во териториите, како и претставници на службата за безбедност Шин Бет.
Според плановите, се подготвуваат и планови за евакуација на цивили од јужниот дел од градот, за да се изолираат од борците на Хамас.