СДСМ бара од Државната комисија за спречување на корупцијата веднаш да отвори предмет за целиот тендер, а од Основното јавно обвинителство да покрене истрага и да утврди одговорност
Социјалдемократскиот сојуз на Македонија (СДСМ) смета дека милионскиот тендер за организирање на возачки испити во Битола, Прилеп и Ресен смрди на корупција и бараат тој да биде целосно расчистен.
Партиската портпаролка Богданка Кузеска вели дека новооснована фирма, зад која стои советник од ВМРО-ДПМНЕ, добила монопол од пет години за спроведување на сите возачки испити во регионите на Битола, Прилеп и Ресен. Кузеска нагласи дека тендерот е доделен на крајно сомнителен начин и дека постои прашање дали фирмата воопшто ги исполнувала условите.
Кузеска посочи дека само неколку дена откако се дозна за скандалот Министерството за внатрешни работи го затворило испитниот центар. Причината за затворањето е, како што наведе Кузеска, дека фирмата немала соодветна документација, стручен кадар, возила и не водела уредна евиденција.
„Сега прашањето е дали МВР на Панче Тошковски додели лиценца на фирма која од старт не ги исполнувала условите? Дали милионскиот тендер е доделен само поради тоа што зад оваа фирма стои советник на ВМРО-ДПМНЕ?“,
праша Кузеска на денешната прес-конференција.
Според Кузеска, ова се јасни индиции дека постои основано сомнение за однапред наместен тендер и сомнежи за корупција кои мора темелно да се истражат.
„По скандалот со набавката на униформи втор пат се случува крупен, сомнителен тендер во МВР за краток период“,
рече таа.
СДСМ бара од Државната комисија за спречување на корупцијата веднаш да отвори предмет за целиот тендер, а од Основното јавно обвинителство да покрене истрага и да утврди одговорност.
„Ќе понесе ли Панче Тошковски одговорност? Наместо да се бори со криминал, министерството стана извор на корупција и сомнителни тендери“,
додаде Кузеска.
Инаку, „360 степени“ во повеќе наврати пишуваше дека има повеќе „црвени знаменца“ при изборот на „Супер возач“ за фирма која ќе го има монополот на испитен центар во Пелагонискиот регион. Газда на фирмата е компанија од Кичево, која е регистрирана во август минатата година, само неколку месеци пред да се објави конкурсот за испитен центар за Пелагонискиот регион. Сопственик на таа фирма е локален функционер на владејачката ВМРО-ДПМНЕ, Филип Митрески.
Во писмената изјава за „360 степени“ во јуни годинава Филип Митрески тврдеше дека неговата партиска припадност нема врска со изборот на негова фирма за испитен центар.
На прашањето, пак, како ќе ја врши дејноста кога неговите фирми немаат искуство во дејноста бидејќи се регистрирани речиси непосредно пред конкурсот, тогаш тој рече тимот кој стои зад неа е составен од професионалци со долгогодишно искуство во областа на возачки обуки, организација на испити и работа со институции од јавниот и приватниот сектор.
Вчера, „360 степени“ објави потврда од МВР дека битолскиот сообраќаен испитен центар „Супер возач“ добил забрана за работа од 30 дена. Во одговорот, од МВР ги објаснуваат и причините зошто кандидатите за прва возачка дозвола или за дополнителна категорија во Пелагонискиот регион, нема да може да полагаат најмалку до 13 септември годинава.
Има три основи за забраната која следува по спроведена инспекција.
Во одговорот се наведува и дека „Супер возач“ има рок од 30 дена да ги отстрани недостатоците. Ако се прочитаат законските и подзаконските акти на кои се повикуваат од полицијата во одговорот до „360 степени“, пак, станува јасно дека е можно и одземање на лиценцата за испитен центар за „Супер возач“. Така предвидува законот, ако испитниот центар не успее да ги отстрани забелешките во дадениот рок од 30 дена.