Во пресрет на средбата помеѓу украинскиот претседател Володимир Зеленски и американскиот претседател Доналд Трамп, двајцата лидери испратија различни пораки за очекувањата за евентуалното постигнување мир помеѓу Украина и Русија
Очекувам „заедничката сила“ на Украина и Западот да ја принуди Русија да склучи вистински мир – рече украинскиот претседател Володимир Зеленски по неговото пристигнување во Вашингтон, каде што денеска треба да се сретне со американскиот претседател Доналд Трамп и да разговара за потенцијалното постигнување мир, откако пред само неколку денови, билатерална средба имаа токму Трамп и рускиот претседател Владимир Путин. Зеленски рече оти сите сакаат оваа војна да заврши брзо и сигурно и оти се надева дека Русија ќе биде принудена да прифати решение.
„Благодарен сум на американскиот претседател за поканата. Сите подеднакво сакаме брзо и сигурно да ја завршиме оваа војна. Се надевам дека нашата заедничка сила со Америка и нашите европски пријатели ќе ја принуди Русија да прифати вистински мир“,
напиша Зеленски.
Од друга страна, Трамп на својата платформа Трут соушал, напиша дека Зеленски може да ја заврши војната со Русија речиси веднаш, ако сака, или може да продолжи да се бори. Притоа, тој ја отфрли можноста за враќање на Крим под украинска контрола и влез на Украина во НАТО, оценувајќи ги овие две барања како „нереални“.
„Се сеќавате како започна. Нема враќање на Обама со оглед на Крим (пред 12 години, без да се испука ниту еден куршум), и нема влегување на Украина во НАТО“,
напиша Трамп.
Европските лидери заедно со украинскиот претседател Володимир Зеленски денес ќе остварат средба со Доналд Трамп во Белата куќа, на која се очекува да се разговара за војната помеѓу Украина и Русија.
Претходно, во петокот, по тричасовната средба меѓу американскиот претседател Доналд Трамп и неговиот руски колега Владимир Путин во воздухопловната база „Елмендорф-Ричардсон“ во близина на Енкориџ, Алјаска, Трамп на прес-конференција рече дека е постигнат „голем напредок“ , но призна дека не е постигнат договор за прекин на војната на Русија против Украина.
По средбата, во авионот додека се враќал за Вашингтон, Трамп имал телефонски разговор со украинскиот претседател Володимир Зеленски и со лидерите на НАТО.