Вистинскиот проблем не е моделот, туку отсуството на ДУИ од власта. Османи не гледаше проблем кога Македонците беа малцинство во институциите, но сега кога постои демократско мнозинство тоа за него станува проблем за соживот, истакнува шефот на македонската дипломатија
Министерот за надворешни работи Тимчо Муцунски се огласи со реакција и ја продолжи полемиката за унитарниот карактер на државата и за иднината на мултиетничкиот модел на Македонија со својот претходник Бујар Османи. Во објавата на Фејсбук Муцунски истакнува дека „нетолеранцијата кон резултатот од демократските избори и честото потенцирање проблеми за соживот се поврзани со неспособноста на ДУИ да прифати дека повеќе не е дел од власта“.
Во реакцијата, Муцунски ги критикува „двојните стандарди“ на политичари кои, според него, се прогресивни и европски кога се на власт, но веднаш штом ќе заминат во опозиција, стануваат апостоли на дестабилизација и поделби.
„Османи не гледаше проблем кога Македонците беа малцинство во институциите, но сега кога постои демократско мнозинство тоа за него станува проблем за соживот,“
истакнува Муцунски додавајќи дека вистинскиот проблем не е моделот туку отсуството на ДУИ од власта.
Тој нагласува дека сегашната влада работи на надминување на штетите кои ги оставиле претходниците – и дома и меѓународно – „со работа, со принципи, со почит, а не со манипулации и закани“.
За Муцунски, демократските избори се единствениот меродавен показател за волјата на граѓаните.
„Демократијата не е валидна само кога сте на власт. Јас верувам во соживот, дијалог и иднина изградена врз вредности, еднаквост и напредок“,
додава тој.
Реакцијата на Муцунски доаѓа откако Бујар Османи ги истакна неговите аргументи според кои – Охридскиот договор е токму она што ја гарантира „функционалната унитарност“ и ги заштитува колективните права, и дека државноста се темели на кохезија и почитување на различностите.
Османи предупредува дека секој напад врз овој модел е директен удар врз иднината на земјата, а решението го гледа во доследно почитување на принципите на Охридскиот договор: правична застапеност, децентрализација и гаранција на колективните права.