Според информациите со кои располага Здружението на новинари, новинарот Авни Тахири и снимателот Шенол Хајредини биле физички нападнати од страна на сопственикот на отпадот на дивата депонија во Визбегово, за кого се смета дека го предизвикал пожарот
Здружението на новинари на Македонија (ЗНМ) остро го осуди нападот на екипата на Телевизија Алсат која денеска известуваше од терен за големиот пожар во Визбегово. Според информациите со кои располага ЗНМ, новинарот Авни Тахири и снимателот Шенол Хајредини биле физички нападнати од страна на сопственикот на отпадот на дивата депонија во Визбегово, за кого се смета дека го предизвикал пожарот.
„Напаѓачот насилно му го одзел мобилниот телефон на новинарот Тахири и го фрлил во огнот, а снимателот Шенол Хајредини бил исто така нападнат и му била скршена камерата. Лицето е уапсено, а случајот е пријавен во МВР“,
информираат од ЗНМ.
Здружението на новинари очекува брза и ефикасна истрага и соодветна санкција за напаѓачот, додавајќи дека е во комуникација со МВР и Обвинителството за заштита на новинарите и медиумските работници.
„Потсетуваме дека со последните измени во Кривичниот законик, секој напад врз новинари при извршување на нивната професионална задача е сериозно кривично дело за кое се предвидени законски казни“,
велат од ЗНМ.
Претходно денеска МВР информираше за инцидентот на местото каде што избувна пожарот во Визбегово, наведувајќи дека се врши службен разговор со лицата што се нападнати. Оттаму дополнително соопштија дека поради непочитување на наредба од службено лице, приведен е А.Н. – сопственикот на отпадот што од утрово гори во скопско Визбегово.