Прашана дали се сомнева на некого од Уставниот суд, Дуковска одговори – сè е можно
Елизабета Дуковска се сомнева дека пресудата со која Управниот суд го поништи нејзиниот избор за уставен судија е донесена „однадвор“. Таа вели дека сите судски пресуди или решенија се работат во АКМИС-системот, чии, пак, обележја ги нема во конкретната пресуда. Наведе и конкретни забелешки.
„Секоја пресуда мора пред уводот да содржи дека се изрекува ’во името на граѓаните на Република Северна Македонија’, оваа пресуда не го содржи тоа. Се чудев јас, кога некој ми спомна, знаете луѓето одат, зборуваат, пренесуваат некои информации, дали се точни или неточни, дека пресудата е, всушност, донесена однадвор и само испечатена, јас реков дека тоа е невозможно. Меѓутоа, кога ја погледнав пресудата, па почнав и јас да се сомневам, да ви кажам, дали е работена во АКМИС. Значи, кога во АКМИС-системот ќе се отвори иконата за куцање пресуда, се отвора предметот, па таму пишува што ќе работиш – пресуда или решение, кликнувам пресуда и се отвора образец. Најгоре на образецот, бидејќи е пресуда, секогаш стои ‘Во името на граѓаните на Република Северна Македонија’. Оваа пресуда не содржи такво нешто“,
вели судијката во интервју за „360 степени“ на МРТ 1.
Дуковска вели дека со никого не е во конфликт и дека не би сакала да претпоставува кој „однадвор“ ја донел пресудата.
360: Се сомневате на некој од Уставниот суд?
Дуковска: Сè е можно. Сè е можно, да.
360: А, што би бил мотивот на некој од Уставниот суд да го направи тоа?
Дуковска: Па, не знам да ви кажам, ете така можеби, да се докаже… Не можам да кажам. Јас со никого сум немала конфликт и не сум личност што влегува во конфликти со луѓе. Се разбирам со мирно или ако не можам да се разберам со мирно, напуштам терен и си продолжувам со животот.
Со пресуда од 15 мај годинава Управниот суд ја поништи одлуката на Собранието од пред две години, кога во април 2023 г., Елизабета Дуковска беше избрана за судијка во Уставниот суд.
Пресудата против Дуковска, Судот ја донел уважувајќи ја тужбата на Антоанета Димовска од Скопје, членка на Судскиот совет, поднесена против изборот на Дуковска.
Управниот суд ја поништил одлуката со констатација дека постапката за утврдување кандидат за уставен судија пред Судскиот совет во февруари 2023 г. била спроведена неправилно и незаконито без Советот да се изјасни за сите тројца предложени.