Во изјава за медиумите на албански јазик, градоначалникот на Чаир, Висар Ганиу, пред просториите на Град Скопје изјави дека отпадот на територија на Чаир не се собира од страна на градското комунално претпријатие, иако граѓаните ја плаќаат услугата
Подоцна во текот на вечерта, скопската градоначалничка Данела Арсовска преку видеоврска од својот фејсбук-профил во живо се вклучи пред канцелариите на Град Скопје. Рече дека Чаир има долг од седум милиони денари кон Јавното претпријатие „Комунална хигиена“, но дека и покрај тоа, комуналците го собираат отпадот во интерес на граѓаните
Градоначалникот на Општина Чаир, Висар Ганиу, заедно со група граѓани доцна синоќа истури отпад пред просториите на Град Скопје. Отпадот претходно во текот на денот бил собран од Старата скопска чаршија, чиј дел, според административната поделба на главниот град, ѝ припаѓа на општината со која раководи Ганиу.
Во изјава за медиумите на албански јазик, Ганиу пред просториите на Град Скопје изјави дека отпадот на територија на Чаир не се собира од страна на градското комунално претпријатие, иако граѓаните ја плаќаат услугата. Оцени дека граѓаните се жртви на екоцид.
„Ова е екоцид што му се прави на нашиот народ. Ние сме затрупани во отпад. Но, нема така да останеме. Народот ќе реагира и ќе добие одговор, бидејќи ние сме даночни обврзници“,
изјави градоначалникот на Општина Чаир, Висар Ганиу, пред просториите на Град Скопје.
За време на акцијата предводена од чаирскиот градоначалник, на терен пристигна и полиција.
Подоцна во текот на вечерта, скопската градоначалничка Данела Арсовска преку видеоврска од својот фејсбук-профил во живо се вклучи пред канцелариите на Град Скопје.
„Господинот Висар Ганиу си го собираше прво ѓубрето од дивоградбите, па откако му пишав дека не му е баш добар планот, нешто сменил со ѓубрево. Повторно со нелегално возило спротивно на закон дошол пред Град Скопје да го истури и тука се задржал – внимавајте – точно три минути. Кога му реков дека доаѓам, џом да го нема. Висар Ганиу, а бе Вики, кај си бе ти, кај избега, зошто не причека да дојдам? Јас ти ги собирам документите за твоите фалсификати за да ти ги презентирам, а ти бегаш од тука. Точно три минути беше тука Висар Ганиу. На нога избегал низ парк кога слушнал дека доаѓам. Многу ми е мило што вечерва покажа каков човек си, да беше маж ќе причекаше тука да дојдам и да ти ги извадам документите што ти ги имаме фатено“,
рече Арсовска во видеообраќањето од својот фејсбук-профил.
Градоначалничката рече дека Општина Чаир има долг од седум милиони денари кон Јавното претпријатие „Комунална хигиена“, но дека и покрај тоа комуналците го собираат отпадот во интерес на граѓаните.
Таа се осврна и кон објектите во Чаир, за кои рече дека се дивоградби, предупредувајќи го Ганиу дека ќе бидат откриени сите криминали во врска со бесправното градење во општината.
„Сите криминали ќе ти ги докажеме, сите – од прв до последен. Да знаеш дека си фатен. Затоа денеска си бришел и поништувал докумени во Катастар, затоа денеска се обидуваш да го скриеш криминалот, но ние ги имаме во оригинал документите. Си ги добавивме од Катастар пред да успееш да ги поништиш“,
додаде Арсовска.
Нетрпеливоста меѓу скопската градоначалничка Данела Арсовска и чаирскиот градоначалник Висар Ганиу, кој е кадар на владејачката ВЛЕН, почна да се развива откако Арсовска минатата недела изврши обиколка на неколку локации низ Чаир каде што се извршуваат градежни активности, за кои обвини дека се дивоградби.
- (ВИДЕО) Арсовска, покажувајќи дивоградби низ Чаир, му порача на Ганиу дека не се плаши од закани
- Меџити за обиколките на Арсовска во Чаир: Жалам што е жртва на друг нарачател, нека појде и во Сарај
Во меѓувреме, Основното јавно обвинителство (ОЈО) Скопје информира дека веќе постапува во врска со сомненијата за дивоградби во скопски Чаир.