Лавров посочи дека Западот веќе ја измамил Русија во 2014 година, кога извршил државен удар во Киев веднаш откако украинските власти и опозицијата постигнале договор.
Шефот на руската дипломатија Сергеј Лавров денеска изјави дека не може да има прекин на огнот пред да има преговори за Украина и рече дека Русија нема да биде измамена од предлозите, прво да се прогласи прекин на огнот во Украина, а потоа да се премине на решавање на конфликтот.
„Кога ни велат: ‘Ајде да склучиме примирје, па ќе видиме’ – не, момци. Ние веќе бевме во тие приказни, веќе не го сакаме тоа. А Макрон, Стармер, Фон дер Лајен и другите европски личности кои сега хистерично бараат САД да се приклучат на антируските акции и да го зголемат бројот на санкции – тоа едноставно ги оддава“,
рече Лавров, обраќајќи се пред наставниците и студентите на Руско-ерменскиот универзитет.
Лавров посочи дека Западот веќе ја измамил Русија во 2014 година, кога извршил државен удар во Киев веднаш откако украинските власти и опозицијата постигнале договор.
„Потоа дојдоа Договорите од Минск, кои, како што подоцна признаа европските политичари, беа потребни само за да му се купи време за Киев. Во 2022 година, на преговорите во Истанбул, Русија и Украина ги парафираа принципите на решението, но Западот им забрани на властите во Киев да потпишат договор врз основа на нив“,
рече шефот на руската дипломатија.
Како што пренесуваат руските медиуми, Лавров нагласил дека Европската Унија се залага за ескалација на украинскиот конфликт со цел да се продолжи со вооружување на режимот во Киев.
„Враќајќи се на тоа што Европската Унија очекуваше од телефонскиот разговор меѓу американскиот претседател Доналд Трамп и рускиот претседател Владимир Путин. Тие рекоа: ‘Ќе видиме’. По разговорот, Трамп и Путин дадоа многу позитивна оценка, се согласија дека треба да се работи на подготовка на конкретни чекори за долгорочно, одржливо решение, вклучително и користење на можноста за прекин на огнот“,
изјави Лавров.
Тој истакна дека фокусот на разговорите е на елиминирање на коренските причини за конфликтот.
„Што направи Европската Унија? Објави дека е одобрен 17. пакет санкции (против Русија). Ова значи дека тие сакаа ескалација на кризата. Тие рекоа: Да, слушавме и не видовме никаква поддршка за безусловно примирје, што би ни овозможило нам, Европејците, да ја вооружиме Украина. Тоа е она што им треба“,
додаде Лавров.
Првите преговори меѓу Москва и Киев во последните три години се одржаа во Истанбул на 16 мај.