Пресудата е донесена на единствено рочиште откако осомничениот признал вина, прифаќајќи дека делото го сторил онака како што било опишано во обвинителниот предлог поднесен од Основното јавно обвинителство Скопје
Триесетгодишен скопјанец доби условна затворска казна поради повикување на насилство и поттикнување омраза кон припадници на ЛГБТИ-заедницата преку објави и коментари од својот профил на социјална мрежа.
За пресудата што ја донел Основниот кривичен суд Скопје, денеска преку писмено соопштение информира Јавното обвинителство на Република Северна Македонија.
Затворската казна од една година, што нема да се изврши доколку во период од една година од правосилноста на пресудата не стори ново кривично дело, на сега веќе осуденото лице му е изречена за кривичното дело ширење расистички и ксенофобичен материјал по пат на компјутерски систем од член 394-г став 1 од Кривичниот законик.
Пресудата, како што информираат од Обвинителството, е донесена на единствено рочиште откако осомничениот признал вина, прифаќајќи дека делото го сторил онака како што било опишано во обвинителниот предлог поднесен од Основното јавно обвинителство Скопје.
„Врз основа на тоа, Судот ја утврди како неспорна фактичката состојба дека сега осудениот на 26.02.2022 година, преку компјутерски систем во јавноста ширел репрезентации на идеи кои поттикнуваат омраза против маргинализирана група“,
се вели во соопштението.
Имено, според краткиот опис на делото, 30-годишниот скопјанец пред нешто повеќе од три години, од својот профил на социјална мрежа коментирал на објави на информативен портал, а кои се однесувале на организација на т.н. Парада на гордоста во Скопје.
Во коментарите, тој повикувал на насилство и поттикнувал омраза кон припадници на ЛГБТИ-заедницата, како припадници на маргинализирана група врз основа на сексуалната ориентација.
Пресудата на Основниот кривичен суд Скопје, како што посочуваат од Обвинителството, е правосилна и извршна.
Оттаму, дополнително, наведуваат дека Основното јавно обвинителство Скопје, следејќи ги европските стандарди за заштита од омраза и дискриминација, активно го следи постапувањето во овие предмети, за што е назначен и посебен јавен обвинител.