Таравари вели дека во моментот, доколку има потреба, може да бидат испратени четири до шест пациенти, а со текот на времето до максимум петнаесет
Турција изразила подготвеност бесплатно да прими до 15 пациенти повредени во пожарот во т.н. нареченото кабаре „Пулс“ во Кочани, а на кои им е потребна долготрајна рехабилитација што може да трае повеќе од една година, вели министерот за здравство Арбен Таравари.
Таравари вели дека оваа понуда ја добил при неговата неодамнешна посета на Турција кога ги посети двајцата пациенти повредени од пожарот во Кочани што се лекуваат во болницата „Чам ве Сакура“ во Истанбул. Во болницата првично беа примени шест пациенти, од кои четворица се пуштени на домашно лекување по подобрување на состојбата.
„Се заблагодарив за тоа што направија таму за нашите пациенти. Изразуваат подготвеност да третираат уште 10 до 15 пациенти на кои ќе им треба долготрајна рехабилитација, над година дена и тоа да биде бесплатно. Во моментот, можеме четири до шестмина пациенти веднаш да ги испратиме, доколку има потреба. Со тек на време, до максимум петнаесет. Тоа е многу добра вест“,
изјави Таравари одговарајќи на новинарски прашања.
Министерот Таравари за време на неговата посета на Турција рече дека посетил двајца од пациентите кои се лекуваат таму. Тој посочи дека тие биле во контактибилна состојба, а нивните родители изразиле задоволство од медицинскиот третман и инсистирале нивната рехабилитација да продолжи во Турција.
Последната информација што минатата недела ја дадоа од Министерството за здравство е дека во странство остануваат да се лекуваат 33 од пациентите повредени во пожарот во Кочани.
Трагичниот пожар во „Пулс“ во Кочани, кој се случи во раните утрински часови на 16 март, однесе 62 животи, а околу 200 лица се здобија со повреди. Повредените беа хоспитализирани во болници во земјата и во странство.