„Институционалниот башибозук го создадовте сите вие со партизацијата на институциите за време на вашите владеења и шурувањето со секакви локални битанги поради болно властољубие, вклучувајќи ја и партијата што сега е на власт, а која сега глуми спасител и стабилизатор“, кажа пратеникот на Левица, Сашко Јанчев, образложувајќи ја интерпелацијата за Тошковски што денеска е на дневен ред во Собранието
„Треба да нѐ води обврската да ја кажеме вистината и да ја браниме правдата. Не бегам, не молчам, не се кријам. Останувам овде со целата тежина на обврската што ја носам. Секој ден од оваа институција ќе биде заложба вашата болка да не остане само нем сведок на незаборавот. Промените се тука, одговорноста се чувствува, правдата е реалност“, кажа министерот за внатрешни работи во одговорот на интерпелацијата
Несоодветно, нестручно, непрофесионално, несовесно и неодговорно. Вака според пратеничката група на Левица, министерот за внатрешни работи Панче Тошковски досега ја извршувал функцијата. Резултатот според нив се голем број скандали во МВР, а кулминацијата е пожарот во Кочани, каде што Министерството под раководство на Тошковски потфрлило во спроведувањето на своите надлежности.
За министерот сето тоа е лажно етикетирање, додека вистината не излезе на виделина.
Овие аргументи денеска ги соочија пратениците на Левица и министерот за внатрешни работи, Тошковски на седницата на која се расправа за неговата интерпелација што ја поднесе опозициската партија.
Интерпелацијата ја образложи пратеникот на Левица, Сашко Јанчев, наведувајќи дека таа се базира на десет основи од кои пет се директно поврзани со пожарот во т.н. кабаре „Пулс“ во Кочани, во кој загинаа 62 лица, а речиси 200 беа повредени.
„Интерпелацијата првенствено ја поднесуваме поради немање никаква контрола врз дискотеката ‘Пулс’, што е изречно законска обврска на МВР. Настанот во Кочани резултира со повеќе од шеесет починати и двесте повредени и на површина изнесе недозволиви и сериозни системски пропусти од страна на институциите и органите (МВР, ДПИ, УЈП, Дирекцијата за заштита и спасување, локални власти, инспекциски органи, републички и општински, Бирото за јавна безбедност, полициски станици и други), кои имаат законска надлежност да го регулираат, надгледуваат и да го контролираат работењето на угостителските објекти од таков тип, особено во однос на безбедноста на јавните настапи и настани и употребата на пиротехнички средства. Сите овие се задолжени да вршат редовни контроли, да издаваат потребни дозволи, да ги регулираат условите за безбедноста и да преземаат мерки за спречување злоупотреби“,
рече Јанчев.
Како што посочи, т.н. кабаре без мака си работело 13 години, без да исполнува минимум услови, што, како што заклучи, е доказ за институционалниот башибозук создаден со партизацијата на институциите.
„Го создадовте сите вие со партизацијата на институциите за време на вашите владеења и шурувањето со секакви локални битанги поради болно властољубие, вклучувајќи ја и партијата што сега е на власт, а која сега глуми спасител и стабилизатор“,
рече пратеникот на Левица.
Покрај потфрлувањето на МВР во делот на исполнувањето на условите за заштита на јавниот ред и мир, безбедноста на сообраќајот, проверка на работно време, гласноста и бучавата, присуството на малолетници по полноќ, на точење алкохол и употреба на наркотични супстанции, како дополнителен аргумент зошто на Тошковски треба да му се изгласа недоверба на Тошковски е фалсификат лиценцата која е издадена во време на неговото министерување.
„Ништо од ова не е завршено. Да беше завршено, дискотеката немаше да постои…Особено сомнителен е моментот што во истрагата се вклучени речиси сите бивши функционери од Министерство за економија, Државниот пазарен инспекторат и други органи, но симптоматично не се вклучени актуелните носители на функции од овие институции, вклучувајќи ги и одговорните лица од МВР, со исклучок на бившиот градоначалник на Кочани. Сите тие не презеле навремени соодветни мерки и пропуштиле да истражат и да санкционираат неправилности во работењето на дискотеката. Конкретно, ова се однесува на одговорните лица во ОВР Кочани, СВР Штип и во Бирото за јавна безбедност. Во јавноста излегоа информации за пријави за нарушување на јавниот ред и мир од страна на дискотеката ‘Пулс’, доставени до ОВР Кочани и СВР Штип. По нив не е постапено, што е спротивно на Законот за полицијата“,
рече Јанчев.
Во таа насока, од Левица наведоа дека е нејасно и индикативно што во истрагата за пожарот не се опфатени актуелната началничка на ОВР Кочани, Марија Цветановска-Маневска, и началникот на Одделот за криминалистички работи во Кочани, Томо Донев, кои се повеќе од една година на функција.
Во своја одбрана Тошковски од собраниската говорница порача дека не се плаши од одговорност и оти останува на функцијата за да се соочи со вистината и да ги разјасни сите дилеми.
„Пред вас не стојам како министер, туку како човек кој ја разбира тежината и одговорноста што ја носи функцијата. Ќе зборувам како личност што носи одлуки, но и како татко, и како министер, и родител. Дозволете ми да кажам дека жалам за секој изгубен живот“,
рече Тошковски додавајќи дека секоја дилема заслужува одговор базиран на факти, а не на политички конструкции.
Тој се осврна на сите точки од интерпелацијата, вклучително и за трагичниот настан во во Кочани нагласувајќи дека во овој случај МВР нема направено пропуст. Министерот потенцира дека лиценцата за т.н. кабаре „Пулс“ била фалсификувана, а во однос на пиротехничките средства нагласи дека МВР работи согласно закон.
„Во случајот со дискотеката во Кочани, такво барање за употреба на пиротехнички средства никогаш не било поднесено. МВР постапуваше во согласност со Законот, и нема законска основа да се тврди дека постои пропуст. Одговорноста е кај оние што дозволиле внесување и употреба спротивно на закон“,
рече тој.
Тошковски посочи дека институциите преземаат мерки за сите отворени случаи, меѓу кои и кражбата на марихуана во Карбинци, злоупотребата на службени документи кај припадник на полицијата, и протестите поврзани со случајот со црквата во Галате. Тој ги отфрли тврдењата за етнички предзнак и обвини одредени структури во ДУИ и СДСМ за обид за дестабилизација.
„Сѐ што видовме е лажно етикетирање. Треба да нѐ води обврската да ја кажеме вистината и да ја браниме правдата. Не бегам, не молчам, не се кријам. Останувам овде со целата тежина на обврската што ја носам. Секој ден од оваа институција ќе биде заложба вашата болка да не остане само нем сведок на незаборавот. Промените се тука, одговорноста се чувствува, правдата е реалност“,
рече Тошковски пред крајот на своето обраќање.
Министерот ги отфрли сите обвинувања и нагласи дека МВР работи професионално, без селекција и под целосна координација со Јавното обвинителство.
Пратеникот на СДСМ, Миле Талески, кажа дека треба да се почека истрагата и да се види кој ќе поднесе одговорност.
„Дали командири, началници и заменик-командири на полицијата ќе бидат опфатени. Но, непобитен е фактот дека МВР потфрли на повеќе основи дента кога се случи пожарот во дискотеката во Кочани, како институција со клучна улога во обезбедувањето и мораше да има морална одговорност“,
рече Талески.
Според него не било направен оперативен план, не бил обезбеден просторот и не бил затворен објектот иако во него било регистрирано присуство на малолетници, не се реагирало за пиротехнички средства и многу други пропусти.
Според него, големиот број осомничени, приведени и притворени лица за трагедијата во Кочани е со цел да се разводенат сите случаи, да се одолговлекуваат до бескрај и да се создаде привид дека МВР и Владата се борат против криминалот и корупцијата.
„Ова е тежок популизам, препознатлив за ВМРО-ДПМНЕ. Но, ајде да ја почекаме истрагата за да видиме дали и кој од надлежните командири, началници и заменик-командири на полицијата ќе бидат опфатени и кој ќе понесе одговорност. Дали началничката на ОВР Кочани, Марија Цветковска-Маневска, дали началникот на криминалистичката полиција во Кочани, Томо Донев, дали началникот на СВР Штип, како и раководителите на крим-полицијата?“,
рече Талевски.
Тој рече дека морален пораз за Тошковски е тоа што советничка во Советот на Општина Кочани, сопартијка на министерот, си поднесе оставка од морални причини, а тој не.
„Глас ‘за’ интерпелација на министерот Панче Тошковски не е прашање на политика, туку прашање дали ќе опстои државата, дали ќе има правда, безбедност и сигурност“,
рече пратеникот на СДСМ.
Додека се одвиваше расправата за интерпелацијата на Тошковски пред Собранието пристигнаа родителите на жртвите од пожарот во Кочани, кои денеска дојдоа во Скопје да побараат одговори за трагедијата во животите ги загубија нивните најмили.