„Фер е да се видиме и да ни кажат. Со самото тоа што одбегнуваат да се сретнеме, тоа многу говори за судбината на проектот“, вели вицепремиерот и министер за транспорт по прозивките од Софија дека македонската страна не одговара на предлог-договорот за заедничка изградба на железнички тунел испратен околу 15 јануари годинава
Имаме преку 15 дописи до Бугарија на коишто немаме одговор, очигледно е дека тие не сакаат да ја градат пругата, вели вицепремиерот и министер за транспорт Александар Николоски во интервју за „360 степени“ на МРТ 1, на прашањето зошто не ѝ враќаат одговор на Бугарија на предлог-договорот за заедничка изградба на тунел на граничната линија, кој стигнал до Владата пред околу три месеци.
Николоски: Фер е да се видиме и да ни кажат. Со самото тоа што одбегнуваат да се сретнеме, тоа многу говори за судбината на проектот. На наша страна се делата, на нивна се зборовите.
360°: Точно ли е дека ви пратиле предлог-договор пред три месеци?
Николоски: И точно е дека ние веднаш го ставивме на седница на Влада и формиравме работно тело на највисоко можно ниво. Уште премиерот не е член на работната група. Значи, таму сум јас, Тимчо Муцунски како министер за надворешни работи, Гордана Кочоска како министер за финансии и Синиша Јовановски како директор на Железници.
360°: Има ли нешто спорно во тој договор?
Николоски: Нормално дека има, треба да седнете да разговарате. И велиме, благодариме што ова ни го доставивте, иако претходно средби имаше, ама ги прекинаа. Еве работна група од наша страна, повисоко од ова нема. Формирајте работна група вие, каква сакате, да седнеме, за еден ден ќе ја завршиме работата. Ама имајќи предвид дека не седнуваме затоа што тие не сакаат да седнеме, тогаш не можеме да ја завршиме работата. Да повторам, ако бугарската страна сака да гради пруга, пруга ќе има и ќе се изгради. Што се дела, што се зборови? Зборови се вакви провокативни изјави од бугарска страна, а дела се дека Софија – Перник нема да се реконструира зашто парите ги тргнаа и ќе ги вложуваат во Софија – Бургас, а Македонија во моментов е единствена земја што гради железница на Коридорот 8.
Николоски го повтори ставот дека Владата не сака да инвестира во пруга која завршува во тунел. Проблемот, како што вели, е фактот дека Бугарија одлучи да не ја обновува пругата од Софија до Перник, односно од Перник до Ѓуешево во втората фаза.
Николоски: Ние во моментов пуштивме во јануари еден дел од пругата, сега го градиме вториот дел од пругата. Бугарија не гради ништо, Албанија не гради ништо. За жал, зашто во наш интерес е тоа да се заврши.
360°: Многу пари се фрлени досега, ако остане само за внатрешен сообраќај, која е логиката?
Николоски: Па, тоа е суштината на проблемот. Да не сме сфатат погрешно жителите на Крива Паланка, но нам не ни треба пруга од Скопје до Крива Паланка. Пуштивме експресен пат, во одлична кондиција е, се стига релативно брзо. Нам ни треба пруга до Софија и до Црно Море, која за жал во моментов ја нема.