Обвинителскиот тим кој работи на случајот со пожарот во „Пулс“, додаваат од ЈОРСМ, интензивно презема итни дејствија со цел обезбедување докази за кривичната постапка
Процесот на испитување на оштетените од пожарот во т.н. кабаре „Пулс“ во Кочани и семејствата на настраданите, како и за нивните полномошници во постапката се очекува да започне на почетокот на мај, информираат од Јавното обвинителство на Северна Македонија (ЈОРСМ).
Од Обвинителството најавуваат дека ќе достават дополнително известување во врска со точниот распоред и динамика на испитувањата, имајќи предвид дека станува збор за голем број на оштетени и засегнати лица кои ќе треба да бидат испитани.
„Обвинителството активно ги прибира сите контактни и адресни податоци на лицата кои се оштетени од пожарот, како и на семејствата на настраданите и нивните правни застапници“,
велат од ЈОРСМ.
Оттаму велат дека во зависност од здравствената состојба на повредените и другите релевантни околности, Обвинителството планира навремено да ги извести сите засегнати лица за нивните права и за начинот на нивно вклучување во постапката, вклучително и нивно испитување.
Обвинителскиот тим кој работи на случајот со пожарот во „Пулс“, додаваат од ЈОРСМ, интензивно презема итни дејствија со цел обезбедување докази за кривичната постапка.
Како што информираат од Обвинителството, во моментов се вршат сослушувања и се координираат вештачења кои се неопходни за расветлување на случајот.
Во пожарот што на 16 март во раните утрински часови се случи во т.н. кабаре „Пулс“ загинаа 62 лица и околу 200 беа повредени.
Пожарот настана за време на концерт на концерт на групата ДНК, кога од искри од пиротехнички средства се запали кровот на објектот.
Министерот за внатрешни работи Панче Тошковски, вчера, информираше дека за трагедијата во Кочани досега се осомничени 68 физички и три правни лица, а истрагата сè уште е во тек.