„Директорот, заедно со посредник, барале и примале поткуп за сместување на болно и неподвижно лице во геријатриска установа“, напиша на Фејсбук, Александар Јанев, директорот на Бирото за јавна безбедност
Приведени се две лица, меѓу кои директор на здравствена установа, поради сомнение за примање поткуп во износ од 20 илјади евра. Ова денеска на својот фејсбук-профил го објави директорот на Бирото за јавна безбедност, Александар Јанев, посочувајќи дека акцијата е спроведена во координација со Основното јавно обвинителство за гонење организиран криминал и корупција (ОЈО ГОКК).
„Директорот, заедно со посредник, барале и примале поткуп за сместување на болно и неподвижно лице во геријатриска установа“,
напиша Јанев на Феејсбук.
Посочи дека во период кога во земјата владее национална тага, некои поединци се осмелуваат нелегално да профитираат.
„Девастираниот систем мора да го вратиме и ќе го вратиме во функција. Не дозволуваме и нема да дозволиме ваквите случаи да останат неказнети“,
вели директорот на БЈБ.
Од МВР денеска информираа дека две лица се приведени под сомнение за примање поткуп и примање награда за противзаконито влијание.
Од Јавното обвинителство посочија дека се постапува за целосно расчистување на настанот, не изнесувајќи повеќе детали.
Во меѓувреме, дел од медиумите неофицијално објавија дека еден од приведените е Мухсин Арифи – в. д. директорот на Специјализираната болница за геријатриска и палијативна медицина „13 Ноември“ – Скопје.
Од Алијанса за Албанците (АА) на Арбен Таравари по денешното приведување на директорот на Специјализираната болница за геријатриска и палијативна медицина „13 Ноември“, кој на функцијата е назначен како кадар на оваа партија, рече дека секој кој се огрешил пред законите мора да понесе одговорност, без разлика на етничка, верска или политичка припадност.
Реакција за приведувањето на директорот Арифи има и од Министерството за здравство со кое раководи токму Таравари.