„Целта ни е да ги мотивираме со покачувањето на капитацијата да работат повеќе на скрининг-програмите, на превентивата, на мотивирање за вакцинација, меѓутоа да им дадеме можност за одредени методи од секундарно здравство што може да ги работат во примарното“, вели министерот за здравство
Директорот на ФЗО вели дека во контекст на подобрувањето на состојбата во примарната здравствена заштита покрај зголемената контрола на рецептите и боледувањата, првпат ќе се воведе мерка за оптимизација на упатување на повисоки нивоа на лекување
Матичните лекари по општа медицина, гинеколозите и стоматолозите од овој месец ќе добиваат повисок капитациски бод за 33, односно за 23 отсто.
Со одлуката за зголемување на вредноста на вредноста на капитацискиот бод избраните лекари по општа медицина и гинекологија сега ќе добиваат по 100 денари, наместо досегашните 75 денари. Кај стоматолозите, пак, зголемувањето е од 61 на 75 денари.
Според премиерот Христијан Мицкоски, одлука за зголемување на капитацискиот бод доаѓа по повеќегодишна стагнација во периодот 2019-2022 година, кога бодот изнесувал 63 и 48 денари.
Мицкоски денеска, на прес-конференција заедно со министерот за здравство Арбен Таравари и директорот на ФЗО, Сашо Клековски, рече дека од 2015 година досега капитацијата за општа медицина и гинекологија е порасната од 50 на 100 денари, додека за стоматологија од 35 на 75 денари, што е зголемување за 114 отсто.
„Потценетоста на примарната здравствена заштита доведе до намалување на бројот на амбуланти во 2024 година во однос на 2023 година за 34 амбуланти по општа медицина и 24 по стоматологија, а над стотина помалку амбуланти по општа медицина има сега во однос на 2015 година. Посебно намалување има во руралните и помалите места, за кои уште во јануари се донесоа посебни мерки“,
рече Мицкоски.
Тој додаде дека државата издвојува околу 4.5 милијарди за матичните лекари, гинеколози и стоматолози, а за ова зголемување ќе се издвојат околу 550 милиони денари или над 9 милиони евра.
На новинарско прашање дали оваа одлука значи и зголемување на обврските за скрининг-програмите кои веќе им стоеја на располагање и дали ќе се зголемат нивните услуги кон пациентите, министерот за здравство Таравари рече дека тоа и било целта на покачувањето.
„Целта беше повеќе да се сконцентрираме на превентивните програми меѓутоа да им даваме и други можности што можат да ги работат одредени општи доктори што се едуцирани за одредени методи што се користат во здравство. Целта е во секој здравствен систем примарното здравство да биде базата, таму каде што одат најмногу пациенти. Целта ни е да ги мотивираме со покачувањето на капитацијата, да работат повеќе на скрининг програмите, на превентивата, на мотивирање за вакцинација, меѓутоа да им дадеме можност за одредени методи од секундарно здравство што може да ги работат во примарното“,
рече Таравари.
Тој рече дека станува збор за методи што може да ги направат одредени матични лекари како ехо на срце, ехо на каротиди или одредени други испитувања за кои се едуцирани во примарната заштита, а доколку има проблеми потоа ќе треба да ги препратат во секундарното или терциерното здравство.
Директорот на ФЗО, Сашо Клековски, рече дека сликата за лекарите од примарното здравство како административци, пишувачи на рецепти и упати мора да биде надмината.
Клековски оцени дека ова „историско зголемување“ на капитацијата треба да го сопре трендот на намалување на бројот на младите лекари и медицински сестри во примарното здравство и да придонесе за поефективна примарна здравствена заштита во земјава.
Тој најави и дека се предвидува контрола на бројот на осигуреници и прочистување на листите како основа за пресметка на капитацијата. Според Клековски, ќе има зголемено финансирање, но и зголемени очекувања и контроли, а реален раст на приходите може да има само со зголемување на работата и продуктивноста.
Во контекст на подобрувањето на состојбата во примарната здравствена заштита, тој рече дека покрај зголемената контрола на рецептите и боледувањата првпат ќе се воведе мерка за оптимизација на упатување на повисоки нивоа на лекување.
Директорот на ФЗО, Сашо Клековски, рече дека сега ќе претстои бран на пензионирање на матични лекари и оти има многу административни проблеми при трансфер на ординацијата кога се пензионираат.
„Мора да имаме олеснување на бирократијата за трансфер на оние лекари кои почнуваат со работа. Треба да видиме и како специјализацијата на семејна медицина да се надгради со дополнителни одговорности за да има суштинска разлика со општите лекари“,
кажа Клековски.