Партијата ги повика лидерите на „Вреди“, заедно или одделно, да изразат јасен револт против обидот за, како што велат, реструктуирање на државата и да не дозволат да бидат вовлечени во планот за целосна дисквалификација на Албанците од општествените текови
Во пресрет на лидерската средба помеѓу премиерот Христијан Мицкоски и лидерот на СДСМ, Венко Филипче, опозициската ДУИ повторно обвини дека на средбата ќе биде демонстрирана моноетничка коалиција која има за цел да го преобликува политичкиот модел на државата од мултиетничка во моноетничка демократија.
Партијата обвини дека на средбата Мицкоски–Филипче ќе има точки кои нема да ѝ се презентираат на јавноста.
Првата точка, како што велат од ДУИ, ќе биде неказнивоста, односно каков правосуден систем им е потребен за да не одговараат, јавно да се напаѓаат, а меѓусебно да се штитат дури и во состојба на трагедии како последната во Кочани. Втората точка за која ќе се разговара на лидерската средба, според ДУИ, е како да се отстранат Албанците од сите нивоа на власт во државата, а потоа да се држат на периферијата на општествените текови.
„Овој план не е нов, скроен е пред три години преку ноторниот договор Мицкоски-Заев пред сѐ како заштитен чадор за транзициската олигархија во земјава. Планот веќе се реализира преку укинувањето на балансерот, моноетничкото одлучување на Уставниот суд, но и отстранувањето на Албанците од голем број високи позиции во државната управа. Реализацијата на овој план е невозможна без да се пронајдат ‘чесните Албанци’ кои треба да обезбедат лажна легитимација за мултиетнички консензус на ова политичко преструктуирање“,
велат од ДУИ во пресрет на средбата на премиерот и лидерот на СДСМ.
Дополнително, партијата ги повика лидерите на коалицијата „Вреди“, заедно или одделно, да изразат јасен револт против обидот за, како што велат, реструктуирање на државата и да не дозволат да бидат вовлечени во планот за целосна дисквалификација на Албанците од општествените текови.
За денеска во 14 часот во Владата е закажана лидерска средба меѓу премиерот Христијан Мицкоски и претседателот на СДСМ, Венко Филипче, на која, според најавите, лидерот на опозицијата ќе го претстави планот за подобрување на состојбите во државата.