Пациент повреден во пожарот во Кочани кој се лекуваше во Грција, се врати во државава

Таравари изрази надеж дека по 24-часовен престој, откако ќе бидат направени токсиколошките испитувања, Ангел ќе биде пуштен на домашно лекување

Дваесет и двегодишен пациент, кој беше повреден во пожарот во т.н. кабаре во Кочани, а кој се лекуваше во Атина, се врати во Македонија. На скопскиот аеродром го пречекаа министерот за здравство Арбен Таравари и министерот за надворешни работи и надворешна трговија Тимчо Муцунски.

Таравари изрази надеж дека по 24-часовен престој, откако ќе бидат направени токсиколошките испитувања, Ангел ќе биде пуштен на домашно лекување. 

Како што информира министерот за здравство, вечерва се очекува во земјава да пристигнат и четворица пациенти од Шпанија.

За четворицата пациенти кои се лекуваат во странство и се во критична состојба, министерот соопшти дека кај нив нема промени.

Министерот за надворешни работи најави дека и во текот на утрешниот ден се очекува враќање на дел од пациентите кои се лекуваат во странство. 

„Продолжуваме со тековна комуникација со здравствените власти во државите каде што се сместени овие пациенти. Нашите дипломатско-конзуларни претставништва се постојано во комуникација и со семејствата“,

нагласи Муцунски во изјава за медиумите. 

Вчера во земјава пристигна првиот пациент кој се лекуваше во странство, односно младо лице кое беше хоспитализирано во здравствена установа во Белград, Србија.

Пристигна првиот од над 100 пациенти што се на лекување во странство по трагедијата во Кочани

Според протоколите на Кризниот штаб во Министерството за здравство, формиран по трагедијата во Кочани, секој од пациентите, како што ќе се враќаат во земјава, минимум 24 часа ќе бидат на опсервација во некоја од клиниките во земјава каде ќе бидат сместени.