fbpx
Свет

Вучиќ по средбата со Фон дер Лајен и Кошта: Не употребивме звучен топ, подготвени сме ЕУ да го провери тоа

360степени | 26 март, 2025 07:51

„Поминавме низ многу теми, клучна тема беше европската иднина на Србија. Реков дека Србија ќе биде апсолутно посветена на таа цел, и повеќе отколку што беше досега, но реков и дека наскоро ќе имаме одлука за формирање нова влада или одлука за нови избори“, рече Вучиќ по средбата со претседателите на Европската комисија и Европскиот совет

Српскиот претседател Александар Вучиќ изјави дека вчера, време на посетата со највисоките претставници на Европската Унија во Брисел, им рекол оти не бил употребен звучен топ на протестот во Белград на 15 март и дека српските власти се подготвени ЕУ да го провери тоа.

Од средбата на српскиот претседател Александар Вучиќ со претседателот на Европскиот совет, Антонио Кошта и претседателката на Европската комисија, Урсула фон дер Лајен

По работната вечера со претседателката на Европската комисија Урсула фон дер Лајен и претседателот на Европскиот совет, Антонио Кошта, Вучиќ рече дека српската влада нема што да крие.

„Им кажав на моите домаќини дека не е употребен звучен топ, дека сме подготвени да го проверат тоа и дека ќе дадеме одговор до Судот во Стразбур без разлика што неговата употреба никаде во Европа не е забранета“,

рече Вучиќ.

Рече дека смета оти неговите соговорници во Брисел можеле да видат колку трпение покажале властите во Србија во намерата да го зачуваат целосниот мир, и оти никаде не покажале нервоза и не употребиле сила.

Вучиќ додаде дека е многу задоволен од разговорот со највисоките претставници на ЕУ, изразувајќи уверување дека средбата значела многу за иднината на Србија и дека тоа ќе се види во блиска иднина.

„Поминавме низ многу теми, клучна тема беше европската иднина на Србија. Реков дека Србија ќе биде апсолутно посветена на таа цел, и повеќе отколку што беше досега, но реков и дека наскоро ќе имаме одлука за формирање нова влада или одлука за нови избори“,

рече претседателот на Србија.

По средбата, највисоките претставници на ЕУ порачаа дека иднината на Србија е во ЕУ, но дека Белград треба да постигне напредок во реформите поврзани со медиумските слободи, борбата против корупцијата и изборите.

Претседателката на Европската комисија, Урсула фон дер Лајен на социјалната мрежа Икс напиша дека во Брисел имала важна средба со претседателот на Србија и ги посочила обврските на Белград на патот кон членството.

Претседателот на Европскиот совет, Антонио Кошта, ја напиша речиси истата порака, наведувајќи дека тој и Вучиќ разговарале за потребата да се унапредат реформите поврзани со членството во ЕУ.

©2025 360 степени, Сите права се задржани