„Уставот не му дозволува на Собранието на Република Северна Македонија со законски решенија на кој било начин да влијае на надлежностите, начинот на избор, престанок на функцијата на уставните судии. Овластувањето на Собранието завршува со моментот на избор на уставните судии“, се вели во соопштението од судот
Уставот на Република Северна Македонија не предвидува никаква можност за разрешување на уставен судија, ниту од страна на законодавната, ниту од извршната власт, соопшти денеска Уставниот суд, по, како што вели, медиумскиот интерес во врска со т.н. интерпелации на уставни судии.
„Уставниот суд како орган на Републиката кој ја штити уставноста и законитоста не подлежи на начелото на поделба на власта. Уставотворецот го поставил Уставниот суд над трите власти затоа што тој е контролорот на нивните постапки, акти и дејствија“,
се вели во соопштението од овој суд.
Оттаму се посочува дека самостојноста на Уставниот суд и уставните судии имаат најсилна уставна гаранција.
„Уставот не му дозволува на Собранието на Република Северна Македонија со законски решенија на кој било начин да влијае на надлежностите, начинот на избор, престанок на функцијата на уставните судии. Овластувањето на Собранието завршува со моментот на избор на уставните судии“,
пишуваат од Уставниот суд.
Институтот „интерпелација“ предвиден во членот 72 од Уставот, велат од Уставниот суд, во никој случај не се однесува и не може да се примени за уставните судии.
„Во спротивно, се губи смислата на Уставниот суд и се прави тешка повреда на Уставот од причина што на тој начин се прави упад во четвртата т.н. уставно-судска власт, во самостојноста и во независноста на судот“,
велат од судот.
Основите за престанок на функцијата уставен судија се предвидени во членот 111 од Уставот.
Секоја постапка или дејствие преземено надвор од оваа уставна одредба би претставувало грубо кршење на Уставот, повреда на уставните гаранции за самостојноста и независноста на Уставниот суд.
Уставниот суд им укажува на сите државни органи дека се должни да се придржуваат на утврдените надлежности предвидени во Уставот, бидејќи никој нема повеќе права од оние што му ги доделува Уставот.
„Секој е должен да ја унапредува уставната, правната и политичката култура како основи на едно демократско општество. Секој е должен да го почитува Уставот“,
информираат од Уставниот суд.
За потсетување, пратениците на Демократската унија за интеграција (ДУИ) на седницата посветена на интерпелацијата на членовите на Судскиот совет, најавија дека ќе бараат интерпелација и на уставните судии.
Посочија дека со интерпелацијата на Судскиот совет се поткопуваат темелите на демократијата и се вршат притисоци за оставка, но оти ќе вратат со исто средство за судиите од Уставниот суд, за кои нагласија дека задираат во албанскиот јазик.
„Ќе почнеме од Уставниот суд. Набргу ќе поднесеме интерпелација за судиите на Уставниот суд кои се избрани во овој дом. Значи, тие го допираат тоа што е недопирливо, таму каде што никој не смее да допира – договоорт што е гарантиран од меѓународната заедница“,
изјави Илир Хасани од ДУИ.