Погледнете го новото издание на емисијата „360 степени”, емитувано на 10 март 2025 г. на МРТ 1, во кое гостуваат министерот Стефан Андоновски, директорот на АВМУ, Зоран Трајчевски, и извршниот директор на ЗНМ, Драган Секуловски
Владата соопшти дека на денешната седница го донела Предлогот на закон за изменување и дополнување на Законот за медиуми, со кој и интернет-порталите стануваат медиуми, се воспоставува ресгистар на портали, како и правила за впишување во него. Во пресрет на оваа одлука, токму на тема регулација на онлајн медиуми, во новото издание на емисијата „360 степени“ на МРТ 1 дебатираме со:
– Стефан Андоновски, министер за дигитална трансформација, чија надлежност се и законите од медиумската сфера;
– Зоран Трајчевски, директор на Агенцијата за аудио и аудиовизуелни медиумски услуги, која ќе треба да го води регистарот на интернет-портали;
– Драган Секуловски, извршен директор на Здружението на новинарите на Македонија, како засегната страна во овој процес;
– Катерина Чалоска-Алексовска, помошник на главниот државен ревизор за ревизија на политичките партии, ДКСК, ДИК, АВМУ и следење на изборниот процес.
Што предвидуваат законските измени и може ли уште сега да се препознаат одредени проблематични точки? Најделикатниот услов за еден интернет-портал да влезе во регистарот е да има „најмалку три лица во редовен работен однос“. Како министерството на Стефан Андоновски стигнало до таа бројка и што ќе значи овој услов за локалните портали. Може ли регистарот утре (по евентуални измени на Изборниот законик) да биде основа за поотчетно и подомаќинско трошење на државните пари за предизборно онлајн рекламирање?