За разрешувањето на државниот јавен обвинител последниот збор ќе го имаат пратениците од каде за негова смена потребни се 61 глас во Собранието
Предлогот за разрешување на државниот јавен обвинител Љупчо Коцевски денеска поминал на владина седница, откако Министерството за правда го подготви предлогот.
Во предлогот од Правда се вели дека Коцевски постапувал во предмети во кои согласно законските одредби постоеле околности кои предизвикуваат сомневање во неговата непристрасност, како и судир на интереси, а за кои тој требало да знае и требало да се изземе.
Сега Владата ќе треба да го достави предлогот до Советот на јавни обвинители, од каде што се очекува мислење во наредните 15 дена.
Во Законот за јавно обвинителство се наведува дека ако Советот на јавни обвинители на Република Северна Македонија од оправдани причини во определениот рок не достави мислење до Владата, рокот се продолжува за уште 15 дена.
„Ако и во овој рок Советот на јавни обвинители на Република Северна Македонија не достави мислење, се смета дека не го поддржува предлогот на Владата на Република Северна Македонија“, се вели во член 88 од Законот за јавно обвинителство.
За разрешувањето на државниот јавен обвинител последниот збор ќе го имаат пратениците, од каде за негова смена е потребен 61 глас во Собранието. На оваа седница, според законот, државниот јавен обвинител може да присуствува и на неа да се произнесе по предлог на Владата за негово разрешување.
Околу предлогот за разрешување на Коцевски денеска од СДСМ рекоа дека се за реформи во судството, но според нив, ова што го прави власта е груба партизација,
„Ставот на СДСМ е јасен по ова прашање и никогаш не бил доведен во дилема. Ние сме за реформи во судството, но ова што го прави власта е дефинитивно една груба партизација. Затоа повикуваме да се тргнат рацете на политиката од судството и да се видат сериозни чекори дека се работи на сериозни реформи во однос на подобрување на состојбата“, изјави портпаролката на СДСМ, Богданка Кузеска, во одговор на новинарско прашање.
Предлогот за разрешување на Коцевски дојде откако Владата на минатата седница го задолжи Министерството за правда да го изработи.
Како што тогаш рече владината портпаролка Марија Митева, во мислењето од Правда што се разгледувало на седницата биле забележани неколку состојби за кои вели дека се спротивни на обврските кои произлегуваат од законските надлежности.
Како што рече Митева, во мислењето од министерството било нотирано дека институцијата со која раководи јавниот обвинител има нарушен углед, а „чувањето на угледот на институцијата е должност која потекнува од Законот за јавно обвинителство, конкретно член 4 став 1“.
Државниот јавен обвинител Љупчо Коцевски, чие разрешување се бара од страна на извршната власт, смета дека од она што досега го слушнал во јавноста нема никаква тешка дисциплинска повреда врз основа на која може да биде разрешен.
Сепак, вели дека ќе се произнесе по предлогот за негово разрешување откако Владата ќе го достави до Советот на јавните обвинители.
Тој минатата недела во изјава за медиумите рече дека доколку се утврди дека се исполнети условите за негово разрешување согласно Законот за јавни обвинители, во тој случај и самиот ќе се повлече.
Министерот за правда Игор Филков, пак, рече дека ако Советот на јавни обвинители даде негативно мислење за предлогот за разрешување на државниот јавен обвинител, тоа не значи дека постапката е завршена. Филков вели дека секое мислење од Советот на јавни обвинители е важно за оваа постапка, но потенцира дека Министерството за правда и Владата нема да се водат исклучиво од мислењата на еден орган ако, како што вели, се поддржуваат лица кои не го водат својот мандат на професионален начин.
Инаку, според Законот за јавно обвинителство, државниот јавен обвинител може да биде разрешен по две основи – ако е член на политичка партија и ако сторил тешка дисциплинска повреда.
Законот не е до крај јасен дали Владата може да предложи разрешување на јавниот обвинител до Собранието и во случај Советот на јавни обвинители да даде негативно мислење по владина иницијатива за разрешување. При избор на државен јавен обвинител, Владата може да избере кого ќе предложи до Собранието само од оние кандидати пријавени на конкурсот за кои Советот на јавни обвинители дал позитивно мислење.
Коцевски на функцијата државен јавен обвинител дојде пред една година, односно на 13 февруари 2024 година.