„Се работи за редовна контрола во програмата на административниот инспекторат. Има некоја опомена, забелешка за некоја воспоставена пракса, не за ингеренции или за нешто друго, туку во однос на праксата којашто, за волја на вистината, е воспоставена токму од ДУИ и СДСМ од 2016 година“, изјави првиот вицепремиер во врска со обвинувањата на СДСМ за наводни неправилности во работењето во Министерството за животна средина со кое раководи Меџити
Првиот вицепремиер и министер за животна средина Изет Меџити ги демантира наводите изнесени од опозицискиот СДСМ во врска со негова наводна корупција во рамки на Министерството за животна средина и просторно планирање (МЖСПП). Вели дека СДСМ оди по паметот на ДУИ, обидувајќи се административна и архивска работа во рамките на Министерството кое го води да ја претстави како скандал.
„Прво се зборуваше за одземање на ингеренции на МЖСПП, па кога увидоа дека инспекторатот, којшто бил автономен во нивно време, сега е дел од Министерството, отидоа на второто обвинување дека има простор за злоупотреба во административниот инспекторат но и тука сакам да расчистиме. Се работи за редовна контрола во програмата на административниот инспекторат. Има некоја опомена, забелешка за некоја воспоставена пракса, не за ингеренции или за нешто друго, туку во однос на праксата којашто, за волја на вистината, е воспоставена токму од ДУИ и СДСМ од 2016 година кога министри биле Нурхан Изаири, па Башким Ахмети, Садула Дураку, Насер Нуредини и завршило со Каја Шукова, значи редица министри од СДСМ и ДУИ“, изјави првиот вицепремиер и министер Изет Меџити одговарајќи на новинарски прашања.
Опомената од Државниот управен инспекторат, како што додаде, е обжалена.
„Сакаат да ја продолжат приказнава. Не може административна работа или архивска работа да се прикаже како голем скандал, ако одиме по скандаливе, ги имаше доста досега“, додаде Меџити.
Неговата изјава уследи откако претходно денеска опозицискиот СДСМ до Владата достави документи за кои тврди дека ги докажуваат сомнежите за корупција и неправилности во работата на Меџити. Во документите, како што рече во изјава за медиумите партиската портпаролка Бодганка Кузеска, е наведено дека Државниот управен инспекторат констатирал неправилности во работењето во Министерството за животна средина, како и дека Меџити ги пречекорувал своите законски овластувања, лично потпишувајќи ги сите предмети.