„Ова беше можност да се стави крај на скапотијата и да се намалат трошоците за граѓаните. Наместо тоа, владејачкото мнозинство избра да ја продолжи својата политика на игнорирање на реалноста и негрижа за граѓаните“, изјави Битиќи
Наместо поддршка за граѓаните, гледаме политички калкулации и отфрлање на предлози коишто може да направат позитивна разлика во секојдневниот живот. Вака пратеникот од СДСМ, Фатмир Битиќи, денеска реагираше на одлуката на владејачкото мнозинство да не ги поддржи предложените измени и дополнувања на Законот за ДДВ.
„Ова беше можност да се стави крај на скапотијата и да се намалат трошоците за граѓаните. Наместо тоа, владејачкото мнозинство избра да ја продолжи својата политика на игнорирање на реалноста и негрижа за граѓаните“, изјави Битиќи.
Според Битиќи, измените би донеле значително олеснување на семејните буџети преку намалување на ДДВ за електричната енергија од 18 на 5 проценти и укинување на ДДВ за основните прехранбени производи.
Тој додаде дека предложените измени би значеле 13 проценти пониски сметки за струја за над 600 илјади домаќинства, како и поевтинување на над 3 000 основни прехранбени производи.
Истото, како што дополни, важи и за основните прехранбени производи. Според него, намалувањето на ДДВ од 5 проценти на нула ќе значи директно поевтинување на храната – односно над 3 000 производи ќе беа поевтини, меѓу кои лебот, брашното, млекото, јајцата, маслото, шеќерот и сите останати основни продукти што секојдневно ги купуваат граѓаните.
„Во време кога цените на храната растат без контрола, кога електричната енергија стана најскапа во регионот, кога граѓаните се принудени да живеат во постојана неизвесност за наредниот месец, мнозинството ги отфрли конкретните мерки што веднаш ќе значеа помали сметки за струја и поевтина храна“, рече Битиќи.
Тој рече дека СДСМ ќе продолжи политички да се бори за системски решенија за замрзнување на цените на основните производи, за фиксни маржи што ќе спречат злоупотреби, за итна примена на Законот за нефер трговски практики, за поевтин „зелен картон“ и за зголемување на платите преку замрзнување на придонесите.