Денешното судење продолжи со сведочење на таткото на Александар, Зоран Ѓорчевски. Тој за неговиот син кажа дека во младоста се лечел од зависност, без да прецизира од што, но дека се излечил. Кажа и дека со семејството Трајковски било во стара кумовска врска и знаел дека Гоце бил вклучен во потрагага по Вања
Гоце Трајковски, кој заедно со Александар Ѓорчевски собирал и прегледувал снимки за исчезнувањето на Вања Ѓорчевска, денеска не се појави во Основниот кривичен суд Скопје каде што требаше да сведочи во продолжението од судскиот процес за убиството на 14-годишното девојче и 74-годишниот Панче Жежовски.
Читајќи ги имињата на петтемина сведоци за денешното рочиште, судијата Ивица Стефановски рече оти бил информиран од обвинителката Жаклина Крстевска-Јосифовска дека не можела да го обезбеди сведокот.
Дополнително, мајката на сведокот, Кираца Трајковска, во разговор со судијата кажа дека тој не можел да се јави на денешната расправа од здравствени причини. Таа појасни дека Гоце Трајковски имал паничен напад и висок крвен притисок.
Инаку, на претходното рочиште, прва братучетка на мајката на Вања во своето сведочење кажа дека таткото на Вања, Александар, првин сам носел снимки и ги прегледувал, а потоа се вклучил и Гоце Трајковски, кој прв се посомневал во возилото „ситроен” што го забележал на снимките и рекол дека можеби имаат некаков траг.
Александар Ѓорчевски се лечел од зависности, открија неговите родители
Денешното судење продолжи со сведочење на таткото на Александар, Зоран Ѓорчевски. Тој за неговиот син кажа дека во младоста се лечел од зависност, без да прецириза од што, но дека се излечил. Кажа и дека со семејството Трајковски било во стара кумовска врска и знаел дека Гоце бил вклучен во потрагага по Вања.
На 27 ноември, кога Вања исчезнала, дознал од својата сопруга со која 40 години биле разведени, но контактирале.
Зоран единствено контактирал со негови бизнис-партнери во Грција. Тој рече дека Александар работел во „Фершпед“ и во „Кометал“, па потоа пак во „Фершпед“. Периодот кога исчезнала Вања неговиот син не работел никаде и живеел со својата мајка.
На денешното рочиште сведочеше и мајката на Александар, Иванка Ѓорчевска која исто така кажа дека Александар во младоста имал проблеми со зависности. На прашање на обвинителката за какви зависности станувало збор кажа:
„Па, од дроги. Но, се се заврши успешно“.
Ѓорчевска сведочеше дека утрото била во станот кога мајката на Вања му се јавила на Александар и му кажала дека ја нема Вања. Таа рече дека Александар во тој момент го ставил телефонот на спикерфон.
„Бргу се облече и излезе. Потоа се јави и кажа дека биле во полициска станица и пријавиле“,
рече таа.
Како одминувало времето, Иванка Ѓорчевска кажа дека почнале да им се вртат мисли дека Вања можеби е грабната за проституција или трговија со органи.
Денешната расправа продолжи со сведочењето на Оли Нешковиќ, сестра на Александар Ѓорчевски.
На првото одржано рочиште во случајот за грабнувањето и убиството на Вања и Панче, обвинетите Љупчо Палевски, Боре Видевски, Велибор Манев и Влатко Кешишов, како и таткото на девојчето, Александар Ѓорчевски, се произнесоа дека не се чувствуваат за виновни.
Според обвинението, тие заедно испланирале грабнување на 14-годишното девојче со цел да присилат член на нејзиното потесно семејство да даде парични средства за откуп. Додека, грабнувањето на оштетениот Панче Жежовски во Велес било со намера да го присилат да им го даде сопственото возило „ситроен“ за да го користат за грабнување на детето во Скопје.
Таткото на Вања од почетокот велеше дека таа е киднапирана, сведочеше мајката на девојчето
Малолетната Вања и велешанецот Панче, кои беа пријавени за исчезнати на 27 и 24 ноември, беа пронајдени мртви во близина на Скопје и Велес на 3 декември 2023 година.
Во врска со овој случај е осомничено уште едно лице за помагање по извршување на кривичното дело против кого постапката ќе се води одвоено.