Дополнително, Хезболах соопшти дека негова цел била и поморска база во близина на градот Хаифа
Сирените за предупредување од воздушен напад утрово се огласиле во Тел Авив откако Хезболах соопшти дека извршил ракетен напад на областа Нирит во предградијата на главниот град на Израел, пренесува „Гардијан“.
Израелската војска соопшти дека околу 20 ракети биле истрелани во најновиот бараж од Либан, од кои пет биле насочени кон централен Израел, а преостанатите 15 кон северот на земјата.
Од ИДФ велат дека се обиделе да ги пресретнат проектилите и дека засега нема извештаи за загинати или повредени лица.
Според информациите што ги објавија израелските медиуми повикувајќи се на полицијата, фрагменти од пресретнувачките проектили паднале во израелскиот град Магаан Михаил, оштетувајќи зграда и возила.
Милитантната група Хезболах, со седиште во Либан, соопшти дека ја гаѓале базата „Глилот“ на израелската воена разузнавачка единица 8200, лоцирана во предградијата на Тел Авив. Дополнително, Хезболах тврди дека негова цел била и поморска база во близина на градот Хаифа.
Според „Гардијан“, на видеоснимки, кои биле потврдени за агенцијата Санад на Ал Џезерира, можел да се види чад како се издига во близина на населбата Беит Арјех, северно од окупираниот Западен Брег и источно од Тел Авив.
Инаку, нападот од Хезболах доаѓа во пресрет на посетата на американскиот државен секретар Ентони Блинкен, кој денеска треба да пристигне во Израел, во рамките на неговата блискоистична турнеја, која, според пишувањата на медиумите, треба да даде нов поттик на преговорите за прекин на огнот во Газа по ликвидацијата на лидерот на Хамас, Јахја Синвар, минатата недела.
Ова е единаесетта посета на Блинкен на регионот по избувнувањето на војната меѓу Израел и Хамас лани во октомври.
Таа доаѓа во период кога израелската војска ја интензивира својата кампања во палестинската енклава, како и против либански Хезболах, кој ја има поддршката на Иран.
Според медиумските извештаи, американскиот државен секретар се очекува да има средби и разговори со раководствата на Израел и на други земјите од регионот во обид да се најде дипломатско решение за конфликтите кои беснеат. Се очекува Блинкен да ги продолжи разговорите меѓу Вашингтон и Израел во врска со очекуваниот одговор на Тел Авив за неодамнешниот ракетен напад од страна на Иран.
Инаку, синоќа израелската војска извршила повеќе од 10 воздушни напади врз територијата на Либан, од кои дел врз јужните предградија на Бејрут. Ова е втора ноќ по ред главниот град на Либан да биде цел на воздушни напади, откако претходно израелската војска бомбардираше објекти на банка во Либан поврзана со Хезболах.
Во најмалку три од синоќешните напади погодена била густо населената станбена област Узаи во Бејрут, која претходно не беше цел на израелските напади.
Според новинските извештаи, најмалку четири лица загинале, меѓу кои и едно дете, а 24 се повредени кога во израелските воздушни напади бил погоден просторот пред влезот на универзитетската болница „Рафик Харири“, најголемата јавна медицинска установа во Либан.