Уставниот суд реши да не поведе постапка за оценување на владината Уредба за прекинување на дејствијата за изборите што беа распишани за 12 април
Уставниот суд, на денешната седница, реши да не поведе постапка за оценување на Уредбата на Владата за прекинување на изборните дејствија, со која е предвидено изборите да продолжат веднаш по завршувањето на вонредната состојба.
Со тоа останува на сила Уредбата што беше донесена на 21 март, два дена пред стартот на кампањата, а која, практично, предвидува период од 22 дена од завршувањето на вонредната состојба до денот на гласање. Според тоа, новиот изборен термин сега зависи од тоа колку ќе трае новото продолжение на вонредната состојба, за што се очекува Владата утре да поднесе предлог до Пендаровски и тој потоа да реши дали ќе донесе нова одлука за прогласување вонредна состојба и колку би траела овој пат.
Освен ако не се донесе нова уредба за изборите или ако се измени постојната, во случај вонредната состојба да трае нови 30 дена (до 15 јуни), тоа би значело дека изборите ќе треба да се одржат во првата половина на јули. Во случај, пак вонредната состојба да се продолжи за две седмици, односно до крајот на мај, изборите би можеле да се одржат на 21 јуни.
Според неофицијални најави од Владата, по лидерската средба во почетокот на следната седмица, би требало да се донесе нова уредба за ажурирање на избирачкиот список. Притоа би се земала предвид можноста увидот во избирачкиот список да тече за време на кампањата.
Лидерот на ВМРО-ДПМНЕ во изминатите денови инсистираше на тоа дека треба да има избори 60 дена по завршувањето на вонредната состојба, повикувајќи се на извештај на Венецијанската комисија, за кој од СДСМ тврдат дека не одговара на македонскиот Устав и дека се однесува на Грузија.
