Засега нема информации за повредени во инцидентот. Осомничениот за нападот е приведен, а мотивите сѐ уште не се познати
Едно лице денеска фрлило неколку запаливи бомби во седиштето на јапонската владејачка Либерално-демократска партија во Токио, објави јавниот сервис и други јапонски медиуми.
Не е соопштено дали има повредени, осомничениот е приведен, а мотивите за нападот сѐ уште не се познати. Од полицијата во Токио не ги коментираат наводите додавајќи дека истрагата е во тек.
Владејачката Либерално-демократска партија е сè понепопуларна во јавноста поради повеќе скандали, вклучително и даночно затајување и проневера на значителни суми пари. Од партијата одбија да го коментираат нападот, упатувајќи ги заинтересираните да ѝ се обратат на полицијата.
Гласањето за долниот дом на јапонскиот парламент е закажано за 27 октомври. Некои политичари инволвирани во скандали ја загубија официјалната поддршка од владејачката партија, но се кандидираат како независни.
Партијата неодамна избра нов лидер, премиерот Шигеру Ишиба, надевајќи се на нов имиџ. Сепак, анкетите покажуваат дека неговата популарност опаѓа, иако не е јасно дали е на пат да ги загуби изборите со оглед на расцепканата опозиција.
Либерално-демократската партија владее со Јапонија, без прекин, неколку децении.