Регионалниот гувернер на Миколаев, Виталиј Ким, на апликацијата за пораки Телеграм информира дека нема жртви во нападот, но дека на некои потрошувачи им е исклучена струјата
Руски сили ја нападнаа енергетската инфраструктура во јужниот регион на Миколаев и лансираа 56 дронови и проектил во ноќен напад врз Украина.
Регионалниот гувернер на Миколаев, Виталиј Ким, на апликацијата за пораки Телеграм информира дека нема жртви во нападот, но дека на некои потрошувачи им е исклучена струјата.
Украинските воздухопловни сили, исто така, известија дека имало пет удари врз инфраструктурни објекти во региони блиску до линијата на фронтот.
Како што информираа тие, соборени биле 22 беспилотни летала, а 27 беспилотни летала за кои се верува дека паднале на територијата на Украина по активните мерки за електронско војување, биле изгубени. Два дрона завршиле во Белорусија.
Градоначалникот на Киев, Виталиј Кличко, изјави дека остатоците од дроновите паднале во дворот на една градинка во главниот град.
Властите во Киев и околниот регион по нападот известија дека нема жртви или оштетувања на клучната инфраструктура.
Регионалните власти во североисточниот регион Сумију соопштија дека напад со дрон предизвикал пожар во административна зграда и оштетил два автомобили.
Руските сили ја уништија клучната инфраструктура во украинските градови пред зимските месеци, што го натера раководството во Киев да ги интензивира молбите до своите сојузници за дополнителна противвоздушна одбрана.
Русија негира дека цели на цивили, иако илјадници луѓе загинаа за време на повеќе од две и пол години војна.