Иако деталите за одмаздата на Израел против Иран се предмет на интензивна дебата во израелската влада, изворите на Си-ен-ен нагласуваат дека распоредот не е директно поврзан со изборите во САД. Но, израелскиот премиер Бенјамин Нетанјаху изгледа чувствителен на можните политички последици од акциите на Израел во американското општество
Планот на Израел да одговори на иранскиот напад овој месец е подготвен, изјави за Си-ен-ен извор запознаен со ова прашање. Израелските власти, вклучително и премиерот Бенјамин Нетанјаху, ги увериле САД дека контранападот ќе биде ограничен на воени цели наместо на нафтени или нуклеарни постројки, навел изворот.
Според истите извори, американските власти очекуваат Израел да возврати на иранскиот напад пред изборите на 5 ноември.
Иако деталите за одмаздата на Израел против Иран се предмет на интензивна дебата во израелската влада, изворите на Си-ен-ен нагласуваат дека распоредот не е директно поврзан со изборите во САД. Но, израелскиот премиер Бенјамин Нетанјаху изгледа чувствителен на можните политички последици од акциите на Израел во американското општество.
Конфликтот на Блискиот Исток стана едно од клучните прашања на американските избори. Претседателот Џо Бајден и потпретседателката Камала Харис се соочија со притисок од прогресивните кругови поради недоволна критика на Израел, додека републиканците, вклучително и поранешниот претседател Доналд Трамп, ја обвинија администрацијата дека не успеала да ја реши кризата, што, според нив, доведе до хаос.
Трамп ја обвини Камала Харис дека нејзината политика ќе доведе до уништување на Израел, а Нетанјаху, наводно, смета на победата на Трамп, кој е поповолно наклонет кон Нетанјаху и неговите потези отколку Бајден и Харис.
Како што се приближуваат изборите, американската администрација почна да врши притисок врз Израел да ги подобри хуманитарните услови во Газа. Во неодамнешното писмо, државниот секретар Ентони Блинкен и секретарот за одбрана Лојд Остин го предупредија Израел дека неуспехот да обезбеди дополнителна хуманитарна помош може да доведе до прекин на американската воена помош.
Сепак, претседателот Бајден и потпретседателката Харис не го потпишаа писмото ниту пак јавно се заканија дека ќе ја прекинат помошта за Израел, и покрај притисокот од прогресивците. Предупредувањето беше испратено речиси во исто време кога американскиот воен персонал и компонентите на напредниот систем за противвоздушна одбрана, кои САД му ги доставија на Израел, пристигнаа во Израел.