Во објаснувањето, кое следуваше по новинарско прашање дали парите што ќе стигнат во Македонија од заемот во висина од 500 милиони евра се кинески или унгарски, Орбан рече дека Унгарија има договор со Кина сите пари што стигнуваат во неговата земја да одат на конкретни проекти за развој на државата
Кинески пари не можеме да ви даваме, а европски пари можеме и ќе ви ги даваме. Ова е одговорот на унгарскиот премиер Виктор Орбан, а кој се однесува на заемот што Северна Македонија ќе го земе од Унгарската експорт-импорт банка.
Во објаснувањето, кое следуваше по новинарско прашање дали парите што ќе стигнат во Македонија од заемот во висина од 500 милиони евра се кинески или унгарски, Орбан рече дека Унгарија има договор со Кина сите пари што стигнуваат во неговата земја да одат на конкретни проекти за развој на државата.
Унгарскиот премиер на заедничката прес-конференција со неговиот домаќин Христијан Мицкоски рече дека од аспект на Унгарија економијата не е најважното прашање меѓу двете држави.
Тоа прашање, како што рече, е второстепено, а примарно е националната безбедност и борбата против миграцијата.
„Ние во Унгарија сите прашања ги решаваме од аспект на безбедноста. Оние што во нашата национална безбедност играат поголема улога со нив имаме поразвиена соработка, а оние што играат помала улога тогаш со нив имаме помала соработка“,
рече тој.
Според Орбан, Северна Македонија не е само пријателска земја на Унгарија, туку и многу важна држава за безбедноста бидејќи се наоѓа на мигрантската рута.
„Доколку има потреба, имаме волја да ви помогнеме на сите начини“,
додаде Орбан.
Информациите дека Унгарија е во улога на параван на Кина во давањето заем од 500 милиони евра за Северна Македонија ги објави Саболч Пањи, главниот истражувачки новинар и уредник на истражувачкиот портал „Ви-сквер“ (VSquare) со седиште во Будимпешта, во чиј фокус се, меѓу другото, руското и кинеското влијание.
Медиумот отвора прашања поврзани со заемот од 500 милиони евра што во јули годинава го договорија унгарскиот премиер Виктор Орбан и премиерот на С Македонија, Христијан Мицкоски, кои негуваат блиски релации.
Конкретно, како дилема се наметнува одлуката на официјална Будимпешта за позајмица од половина милијарда евра за С Македонија во услови кога владата на Орбан се соочува со сериозни финансиски предизвици.
Во статијата конкретно се спомнува кредитот од една милијарда евра што претходно оваа пролет официјална Будимпешта го зеде од три кинески банки – податок што не беше јавно објавен од унгарската влада – но како информација подоцна се најде на веб-страницата на унгарската владина агенција за јавен долг.
Законот за задолжување од 500 милиони евра кај Унгарската експорт-импорт банка беше изгласан во македонското Собрание на 17 овој месец.
Од владата рекоа дека заемот ќе внесе свежи пари во македонската економија и ќе помогне во развојот на општините преку поддршка на проекти.
Според Законот, заемот од Унгарската експорт-импорт банка ќе се повлече во една транша, а рокот за негова отплата е 15 години, со вклучен грејс-период од три години. Каматната стапка е фиксна и изнесува 3,25 проценти. Во него се предвидува Северна Македонија да ѝ плаќа на Унгарската експорт – импорт банка приватно друштво со ограничена одговорност провизија за неповлечени средства во висина од 0,5 проценти од заемот на годишно ниво.
Провизијата за неповлечени средства ќе се пресметува на дневна основа на неповлечениот дел од заемот, пресметано од датумот на достапност на средствата и ќе се плати првиот работен ден по завршување на периодот на достапност.
Заемот ќе се отплаќа на 24 полугодишни рати, на 15 февруари и 15 август секоја година. Дополнително, Република Северна Македонија ќе ѝ плати провизија за извршени правни услуги на независна фирма избрана од страна на Унгарската експорт – импорт банка приватно друштво со ограничена одговорност.
Инаку, заемот беше договорен кон средината на јули од страна на премиерот Христијан Мицкоски и неговиот унгарски колега Виктор Орбан за време на нивната средба на маргините на Самитот на НАТО во Вашингтон.