Владата на денешната седница ја усвои Информацијата за можноста за користење на Фондот за солидарност на Европската унија (ФСЕУ) за справување со финансиското влијание на ковид-19.
Во април 2020 година, како дел од Иницијативата за инвестициски одговор на коронавирусот ЕУ го прошири опфатот на ФСЕУ и тој сега вклучува и финансирање на активности поврзани со сериозни вонредни ситуации од здравствена природа поврзани со ковид-19, и обезбеди финансиска поддршка од околу 800 милиони евра за најпогодените држави, со што би се олеснил товарот предизвикан од итните мерки.
Пристап до овој фонд имаат земјите членки на ЕУ, како и земјите кандидати за членство во Унијата.
На денешната седница, како што соопштија од Владата, исто така е прифатен усогласениот текст на амандманот 3 од Договорот за грант со САД, од програмата на УСАИД, за развојната цел „Република Северна Македонија е просперитетно, самоодржливо и инклузивно демократско општество“.
Со овој амандман на Договорот, УСАИД го зголемува износот на средства кои ги доделува со дополнителни 15 929 675 долари, кои ќе бидат наменети за поддршка на растот на приватниот сектор, за поголема вклученост на информирани граѓани, за програми за добро владеење, како и за проекти за подобра кохезија во општеството.
Од Владата информираат дека на денешната седница е усвоена и информацијата за почнување на програмирањето на Инструментот за претпристапна помош ИПА III за периодот 2021-2027,
Владата ги задолжи министерствата да ги спроведат подготовките на стратешкиот одговор, организацијата на состаноците на секторските работни групи, како и подготовката на Акциските фишеа за 2021 и 2022 и Акциската програма во рамките на ИПА III.