Централниот настан, односно свечената академија ќе се одржи во Македонската филхармонија во Скопје, на која ќе биде изведена пригодна културно-уметничка програна, а ќе биде заокружен со обраќање на претседателот на Владата, Христијан Мицкоски
Северна Македонија денеска го слави Денот на независноста – 8 Септември, кој годинава под слоганот „Заедно се бориме, заедно ќе успееме!“ ќе биде одбележан со повеќе активности во организација на Владата.
Пред 33 години на денешен ден, над 95 проценти од граѓаните на Референдум се изјаснија за самостојна и суверена држава.
Централниот настан, односно свечената академија ќе се одржи во Македонската филхармонија во Скопје. Според програмата. Свеченоста ќе започне интонирање на македонската химна, која ќе ја изведе детски хор, а потоа ќе биде прикажан видео-спотот „Везилка“ со оригинална изведба на песната од Блаже Конески.
Програмата ќе продолжи со изведби на дела од македонски автори во духот на празникот, кои ќе прозвучат во аранжман на државниот џез оркестар.
Ќе биде прикажан и специјално подготвен видео-спот во кој ќе провејуваат архивкси материјали од прославата на независноста по Референдумот во 1991 година.
Свечената програма ќе финишира со обраќање на претседателот на Владата, Христијан Мицкоски.
Настанот, како што најавуваат од владината прес-служба, е дел од пошироката иницијатива на Владата за подигање на свеста за значењето на независноста и заедничката борба на граѓаните за подобра иднина.
По повод одбележувањето на 8 Септември – Денот на независноста собраниска делегација предводена од потпретседателката Весна Бендевска, а составена од пратениците Каролина Насковска и Митко Трајчулевски, денеска ќе положи венци свежо цвеќе пред вечното почивалиште на првиот претседател на Републиката, Киро Глигоров, вечното почивалиште на поранешниот претседател на Републиката, Борис Трајковски, вечното почивалиште на првиот претседател на Владата, Никола Кљусев и пред Споменикот на паднатите борци на НОБ.
Активностите за одбележување на празникот почнаа синоќа со почесна артилериска стрелба. Беа истрелани 10 плотуни од артилериски орудија од страна на артилерискиот баталјон на Армијата на Република Северна Македонија во касарната „Илинден“ во Скопје.
Претходно вчера, на пригодна свеченост во свеченост во Собранието на спортскиот работник, тренер и претседател на Теквондо федерацијата на Македонија, Борче Костовски, му беше доделана годинешната награда за животно дело „8 Септември“. Наградата му беше доделена за неговиот успех што го постигна како тренер на олимпиецот Дејан Георгиевски, кој на Олимписките игри во Токио во 2021 година го освои сребрениот медал.
По повод празникот, во петокот претседателот на Собранието Африм Гаши организираше свечен прием во Кристалната сала на законодавниот дом. Тој во своето обраќање пред присутните, меѓу другото, рече дека не постои поважен момент во историјата на една земја од нејзината самостојност. Собранискиот спикер нагласи дека секој има своја заслуга и свој придонес за овие достигнувања, посочувајќи оти не треба да бидеме ниту нихилисти, ниту дефетисти. Воедно тој порача дека новата генерација на политичари носи нова развојна перспектива за земјата, која, како што додаде, е силно убеден дека ќе резултира со многустран успех.
На Рефендумот во 1991 година на кој 95 проценти од граѓаните се изјаснија за самостојна и независна држава му претходеа низа историски одлуки. На 25 јануари истата година беше усвоена Декларацијата за независност од првото повеќепартиско македонско Собрание, а два дена подоцна пратениците го избраа Киро Глигоров за прв претседател на самостојна и суверена Република Македонија. Важни чекори за утврдување на државноста беа усвојувањето на новиот Устав на 17 ноември 1991 година, монетарното осамостојување и воведувањето на денарот на 26 април 1992, формирањето на сопствени вооружение сили. Меѓународно-правниот субјективитет на државата дефинитивно беше потврден на 8 април 1993 година, кога со акламација во Генералното собрание на Обединетите нации, земјата беше примена како 181. полноправна членка на Светската организација. Поради противењето и притисоците од страна на Грција, која не го прифаќаше уставното име на Република Македонија, зачленувањето во ОН беше под привремената референца – Поранешна Југословенска Република Македонија.
Низ 33-годишното самостојно опстојување, државата помина низ низа проблеми и тешкотии. Троцифрената инфлација на почетокот на 1990-те години, грчкото ембарго, косовската бегалска криза и конфликтот во 2001 година беа вистински предизвици и закани за младата македонска држава што го забавија нејзиниот пат.
Спорот со Грција поради името, по долгогодишни разговори под покровителство на Обединетите нации, конечно беше решен на 17 јуни 2018 година во Преспа со попишување договор меѓу двете држави. Со тоа се отвори патот на земјава за членство во НАТО и Европската Унија. На 27 март 2020 година Северна Македонија стана 30 членка на НАТО. Како земја кандидат за членство во ЕУ веќе 18 години, со добиена прва препорака за почеток на преговори во 2009 година, државава сега се соочува со блокада од Бугарија.