Петмина се приведени, соопшти МВР, меѓу кои и лице со иницијали – С.М. или М.С. (во соопштението истото лице на едно место е наведено како С.М., а потоа како М.С.)
Некои медиуми вчера јавија дека лицето што пукало е М. Сулејмани, внук на поглаварот на Исламската верска заедница, Сулејман Реџепи
Пет лица од Глумово и од Рашче се приведени во полиција по вчерашниот инцидент кај Матка во Скопје, според денешниот билтен на МВР.
Како што соопштија од МВР, вчера од слобода се лишени С.М. (46), Е.Б. (32), С.И. (24), И.Р. (24) сите од с. Глумово и К.В. (24) од с. Рашче поради постоење основи на сомнение дека сториле кривично дело „насилство“.
На 9 мај, во 20.20 часот, С.С. (31) од с. Глумово пријавил во СВР – Скопје, дека околу 15 часот, додека со неговите браќа С.С. и А.С. биле на работно место во планинарски дом „Матка“ забележал дека М.С. пука со пиштол кон неговиот брат А.С. до кого биле и М.С. и И.С., кои носеле пиштоли, И.С. кој носел нож, Ќ.С. носел бејзбол палка и Р.Е. Во еден момент Ќ.С. со бејзбол палка физички го нападнал пријавителот. По настанот пријавените го напуштиле местото на настанот.
Некои медиуми вчера јавија дека лицето што пукало е М. Сулејмани, внук на поглаварот на Исламската верска заедница, Сулејман Реџепи. Полициски извор за „360 степени“ соопшти дека повод за тепачката, а потоа и за пукањето, била расправија за движењето на чамците за туристички прошетки до пештерата во кањонот.
Се преземаат мерки за расчистување на случајот, се наведува во соопштението на МВР.