На дополнителното новинарско прашање за тоа каков дипломатски скандал ќе настанел, Гаши не одговори
Претседателот на Собранието рече дека не ги прекршил овластувањата со тоа што неговото обезбедување отишло да ја смири ситуацијата на аеродромот
Јас само интервенирав во делот да се смират ситуациите, да не се направи дипломатски инцидент, вели претседателот на Собранието на С Македонија, Африм Гаши во врска со вчерашниот инцидент на Меѓународниот аеродром во Скопје со претседателката на Косово, Вјоса Османи.
Прашан денеска за коментар за инцидентот и што точно се случувало со неговото обезбедување, собрансикиот спикер рече дека тој не е човекот кој точно може да каже што се случувало. Според него сè се завршило како што треба.
„Имаше соопштенија, јас само интервенирав во делот да се смират ситуациите, да не се направи дипломатски инцидент и мислам дека заврши сè како што треба. Како имало или ако некој ги пречекорил своите овластувања, секако секој кој и да го направил тоа треба да одговара. Поинаку нема смисла правната држава и праведноста ако не сме објективни и ако не ги почитуваме нашите закони, протоколи и сe што ние го носиме и како закони и како други подзаконски акти одредби“,
изјави Гаши.
За тоа каков дипломатски скандал ќе настанел, како што рече, Гаши одговарајќи на дополнително прашање на новинарите не одговори.
„Кажав тоа што имав да го кажам и ако сакате сега интервју да правиме половина час тоа е друго“,
додаде спикерот.
Претседателот на Собранието рече дека не ги прекршил овластувањата со тоа што неговото обезбедување отишло да ја смири ситуацијата на аеродромот.
„Не, затоа што моето обезбедување отишло да се смири ситуацијата и ако некој сака да смири нешто и ако сака некој од тоа да гледа да направи тенденција тоа е до тие луѓе. Мојата заложба и денеска и вчера и секогаш била и ќе биде да смирувам да зближувам и да работиме за сите граѓани, а не да делиме и да правиме инциденти“,
изјави собранскиот спикер, одговарајќи на новинарско прашање со која цел негово обезбедување како претседател на Собранието имало потреба да оди на Меѓународниот аеродром и да спречува како што вели тој дипломатски скандал и дали со ваквиот чекор ги прекршил овластувањата.
Тој кажа дека не се слушнал со претседателката на Косово Вјоса Османи по инциднентот.
На новинарско прашање, формулирано како забелешка дека е на различна линија со Министерството за внатрешни работи од каде велат дека разгледуваат пријава за инцидент, Гаши рече дека кажал се што требало да се каже и дека има соопштенија и од неговиот кабинет и од Министерството за внатрешни работи.
На прашањето дали „посоченото лице сè уште работи кај вас во обезбедувањето“, Гаши одговори со контрапрашања и констатации.
„Новинарот: Посоченото лице сè уште работи кај вас во обезбедувањето?
Гаши: Кое посечено лице?
Новинарот: Од МВР велат дека има пријавено лице.
Гаши: А кое е тоа лице?
Новинарот: Јас не го кажав со име, не знам само прашав?
Гаши: Кога не знаете зошто прашувате дека имало одредено лице? Значи немало“
За потсетување до Минустерството за внатрешни работи синоќа информираа дека вчера утро околу 10 часот на Меѓународниот аеродром „Скопје“, член на обезбедувањето на собранискиот спикер Африм Гаши кој воедно е полициски службеник, направил инцидент со вработени во ТАВ Македонија.
Имено, додека претседателката на Косово, Вјоса Османи поминувала на гранична контрола, во моментот кога од неа било побарано да го остави телефонот за да помине низ скенер, едно лице од нејзиното обезбедување го оттргнал вработеното лице од ТАВ, за таа да помине без скениран телефон и рачен багаж. Иако вработениот бил оттргнат, сепак багажот бил вратен и поминал на скенер.
Половина час по случајот, на аеродромот пристигнало лице од обезбедувањето на претседателот на Собранието, Африм Гаши кој е полициски службеник, заедно со уште двајца припадници на полициските служби и започнал да се заканува на вработените во ТАВ и го барал „виновникот“ кој и направил проблем на Османи, притоа туркајќи полициски службеник кој бил вработен на граничниот премин.
„Веднаш е известен Одделот за внатрешна контрола, криминалистички истраги и професионални стандарди и во координација со ОЈО за ГОКК се преземаат мерки за расчистување на случајот, по што ќе бидат поднесени соодветни поднесоци“,
информираа од МВР.
Од кабинетот на Африм Гаши синоќа го соопштија речиси истото што тој денеска го кажа одговарајќи на прашања на медиумите, дека членовите на безбедносниот тим на спикерот биле присутни само за да помогнат во смирувањето на ситуацијата настаната од недоразбирањето помеѓу обезбедувањето на претседателката на Косово, Вјоса Османи и припадниците на аеродромското обезбедување.
По инцидентот, од ТАВ Македонија рекоа дека на проверки се обврзани и патниците кои патуваат преку ВИП-салонот.
За случајот реагираше советникот за медиуми на косовската претседателка, Беким Купина кој смета дека однесувањето на македонскиот аеродромски службеник е спротивно на секоја меѓународна практика, според која, шефовите на држави кога патуваат се заштитени со дипломатски привилегии и имунитети.
Од Министерството за надворешни работи и дијаспора на Косово денеска преку соопштение изразија загриженост за инцидентот, наркувајќи го „недостоинствен“, односот на обезбедувањето на скопскиот Меѓународен аеродром кој претседателката Османи. Косовското МНР, како што јави дописникот на МИА од Приштина, побарало официјални појаснувања во врска со инцидентот од амбасадата на Северна Македонија во Приштина и од македонското Министерство за надворешни работи и за надворешна трговија.
„Министерството за надворешни работи и дијаспора со загриженост дозна за инцидентот предизвикан на скопскиот аеродром во врска со недостоинствениот однос кон претседателката на Република Косово, др. Вјоса Османи. Министерството за надворешни работи и дијаспора, преку Амбасадата на Косово во Скопје, започна со собирање информации и уште од раните утрински часови бара официјални појаснувања од амбасадата на Северна Македонија во Приштина и од Министерството за надворешни работи на Северна Македонија. Министерството за надворешни работи ќе ја информира јавноста за понатамошните активности, за да се расчисти оваа ситуација и да се погрижи во иднина да не се случуваат вакви инциденти во однос на шефовите на нашата држава“,
се наведува во соопштението на косовското МНР.
Од опозицискиот СДСМ, пак, велат дека јавноста е во целосна конфузија по вчерашниот инцидент со претседателката на Косово, Вјоса Османи откако сите страни излегоа со своја верзија на настанот и побараа негово целосно расчистување.