Претходниот министер за правда, Кренар Лога, ја донел одлуката во февруари годинава, а одобрение добил на 6 јуни од техничката влада. Сегашниот министер Игор Филков вели, одлуката на Лога не била искомуницирана со јавноста и целиот процес бил таен
Министерот за правда, Игор Филков, денеска најави дека ќе ја повлече одлуката за зголемување на нотарските тарифи, која требаше да стапи во сила од 1 септември.
Одлуката за зголемување на нотарските услуги за 10 пати повеќе ја донесе претходниот министер Кренар Лога.
„Ова нема да се случи, затоа ќе ги повлечам измените за новата тарифа. Вака не се работи. Не смее народот да плаќа нешто 10 пати повеќе, односно не смеат да се носат одлуки без да има широка дебата, без да слушнеме што мислат за тоа сите засегнати страни“,
рече денеска Филков на брифинг со новинарите.
Лога ја донел одлуката во февруари годинава, а одобрение добил на 6 јуни од техничката влада. Филков потенцира дека одлуката на Лога не била искомуницирана со јавноста и целиот процес бил таен.
„За промената на цената по кој билo основ мора да има сериозна анализа. Мора да има утврдена потреба од сериозно зголемување, како што предвидел претходниот министер, кој од неразбирливи причини терал некоја агенда за поскапувањето“,
додаде Филков.
Тој најави дебата по прашањето со цел да не бидат оштетени ниту граѓаните ниту нотарите.