„Веќе кажав дека балансерот воопшто е злоупотребуван. А тоа значи дека Македонци се пишувале Албанци, Албанци се пишувале Македонци, припадници на другите етнички заедници се пишувале или Македонци или Албанци, со цел да се вработат во јавните институции. Целта на балансерот е да има правична застапеност на етничките заедници“, вели министерот за јавна администрација
Како министер нема да отстапам од почитување на законите во форма како што се сега напишани. Ние како министри мора да ги почитуваме законите. Каков било коментар од колегите од „Вреди“ е беспредметен. Се надевам дека и нивната интенција е да се почитуваат законите. Ова денеска на отворањето на првата од серијата дискусии за реформите во јавната администрација го изјави министерот за јавна администрација Горан Минчев коментирајќи ги реакциите на коалицијата „Вреди“ за примена на алатката балансер за вработување на припадници на различни етнички заедници во јавниот сектор.
Според Минчев, во законот јасно стои дека алатката баленсер се применува исклучиво на резидентното население што живее на територијата на државата, согласно податоците на последниот попис, па затоа посочи дека нема да отстапи од она што го пишува во законот.
Како што вели тој, во неговите изјави изминатиот период повеќепати посочил дека балансерот воопшто е злоупотребуван, наспроти неговата цел да има правична застапеност на етничките заедници во јавниот сектор.
„Веќе кажав дека балансерот воопшто е злоупотребуван. А тоа значи дека Македонци се пишувале Албанци, Албанци се пишувале Македонци, припадници на другите етнички заедници се пишувале или Македонци или Албанци, со цел да се вработат во јавните институции. Целта на балансерот е да има правична застапеност на етничките заедници“,
рече тој.
Она што вчера го дал како коментар, Минчев вели дека е во насока на спроведување и на почитување на законите.
На прашањето дали различните толкувањата на балансерот со коалицискиот партнер во Владата може да доведе до отпор или блокада од коалицијата „Вреди“ при носење на клучните закони за јавниот сектор, Минчев рече дека очекува да се направат заеднички законски решенија, односно дека очекува консензус по предлог текстовите на новите закони.
„На денешната дебата има и претставници на Владата што се од редовите на ‘Вреди‘. Сметам дека овие дебати ќе ги исцрпат можностите да дојдеме до заеднички законски решенија, зашто никој не е индивидуалец во оваа Влада. Сепак, ова се закони што ќе ги донесе новата Влада, односно ќе ги донесе парламентот, но по предлог на Владата. Министерството за јавна администрација е носител на овие законски решенија и се надевам дека ќе имаме консензус по предлог текстовите на новите закони“,
рече тој.
Минчев вчера посочи дека со законското спроведување на балансерот нема намера да го провоцира коалицискиот партнер и оти се надева дека колегите од „Вреди“ ќе се вразумат, па ќе потрошат повеќе внимание на читање на постоечките закони и ќе се посветат на нивно спроведување и нема да се занимаваат со дневнополитички теми.
Коалицијата „Вреди“, составена од повеќе партии на Албанците, која е дел од владиниот состав заедно со ВМРО-ДПМНЕ и ЗНАМ, неколку пати реагираше на изјавите на министерот Минчев од редовите на партијата на Максим Димитриевски, во врска со примената на балансерот, во насока дека на тој начин сакаат да градат антиалбанска доктрина.